Dore ingeso uzabona ku mugore wawe ukamenya ko asigaye aguca inyuma

Urukundo ruba hagati y’umugabo n’umugore, niryo pfundo ryo kubaka urugo rugakomera, n’ababakomotseho bagahora bishimiye ababyeyi babo. Kwizerana no kudahemukirana hagati y’abashakanye bikaza ku isongo mu gushakira hamwe icyabateza imbere kurusha uko mwahora muryana.

Mugabo niba hari ibyo ubona byahindutse ku mugore wawe, uko yitwara ukabona bitari bisanzwe, rimwe na rimwe hari igihe biba bifite ikibihatse, aha turagaruka ku ngeso y’ubusambanyi. Dore ikizaguhishurira ko umugore wawe arimo kuguca inyuma.

Impinduka mu buriri : Umugore uguca inyuma, ahanini ubushake yagiraga bwo gukora imibonano mpuzabitsina buragabanuka, wowe iyo umukozeho ahora akubwira ko atameze neza, kuko aba yumva atakigukeneye bitewe n’uko hari ahandi aba yizeye ibyishimo kuruta uko wabimuha.

Impinduka mu mivugire : Umugore wataye umurongo w’urugo, akajya ahandi, uko byagenda kose atangira kukubwira n’akari i Murori, rimwe na rimwe akaba yanakwerurira akakubwira ko atari wowe mugabo ubaho ku isi wenyine, agasuzuguro akakakugaragariza ku buryo bwose.

Impinduka mu kwita ku rugo : Uzasanga abana batakitabwaho nk’uko byari bisanzwe, umutungo w’urugo uzasanga isesagurwa, cyangwa se ugasanga yaratangiye gufunguza konti ye ku ruhande, rimwe ayishyiraho ayo yakwibye cyangwa se ayo yakuye mu bandi bagabo basambana, ingendo zidashira, kwitabira ibirori utazi nk’umugabo we,…

Imibanire ye n’abaturanyi irahinduka: Niba wowe mugabo utaba mu rugo, iwawe mu gihe haza undi mugabo udahari, uko byagenda kose bitera umugore urwicyekwe, icyo ucyetse cyose wakimubwira akikanga ko wabibwiwe n’abaturanyi, ni na hahandi aba atakifuza ko hari umuntu wo mu muryango wawe [umugabo] uza kuba muri urwo rugo cyangwa ngo abe yaharara kabiri, reka da, bamubuza umutekano, akumva ko bamuvamo.

Agukinga ibintu byose : Tugarutse ku cyavuzwe haruguru ko ashobora gufunguza konti ye utazi kuri banki, no kuba wamufatira telephone ntabwo aba abishaka kuko aba akeka ko wasangamo amabanga yibagiwe gusiba, hari ubwo uzasanga kwinjira mu butumwa bwo muri telefoni bisaba kubanza gushyiramo kode ngo ubashe kuba wakinjiramo,…

Guhuzagurika: Ibyo akora byose uzasanga atakiri ku murongo nk’uko byari bisanzwe, umutima we uhora ahandi, urwicyekwe rukaba rwose, umubwiye amagambo yo gutebya akamutuka, hari n’imvugo nshya uzumva akoresha zo kuzimiza ngo utamenya icyo avuze, kimwe n’uko aguhimba amazina wowe utabizi,…

Igihe cyose umugore aguca inyuma wowe utarabimenya ahorana ubwoba, iyo yakuyeho nibwo ushobora kumufata akakubwiza ukuriko ko abikora, akagushinja ibyaha bitagira ingano, ko utuzuza inshingano nk’umugabo, ko na we ufite abandi bagore ku ruhande, kandi akuziza ubusa utajya unamuca inyuma ahubwo ari ingeso we ubwe yadukanye.

Mugore, mugihe cyose ukoze ikosa ryo guca inyuma umugabo wawe, menya ko urimo kwiyangiza, urimo kubabaza umugabo wawe kandi ari we uguhesha icyubahiro ufite, abana bawe urimo kubicira ejo hazaza, uretse n’ibyo niba wemera Imana, urimo gukora icyaha yanga urunuka.