Kuva kera bizwi ko ubwami buba bugenzura ubutunzi bwose bw’ibihugu ugasanga kuvuka mu muryango nk’uyu hari amahirwe biguha yo kubaho ubuzima bwawe bwose ntacyo wifuje, ari yo mpamvu tugiye kurebera hamwe abami bakize cyane mu bakiriho ku Isi kuva Danemark kugeza muri Arabia Saoudite :
1.Umwami wa Espagne Felipe VI ngo afite agaciro ka miliyoni 2.8$. Muri Mata 2022, yahisemo guhishura umutungo we mu rwego rwo gukorera mu mucyo nyuma y’itegeko ritegeka umuryango w’ibwami gusangiza raporo y’imari buri gihembwe.
2. Umwami Philippe w’u Bubiligi, mu 2013 yavuze ko afite agaciro ka miliyoni 14 z’amadolari. Kuva ubwo ubwami ntabwo burongera gusohora raporo ijyanye n’imari yabwo.
3. Umwami Harald V, wimye ingoma muri Norvege mu 1991, bivugwa ko afite agaciro ka miliyoni 30$. Nubwo bimeze gutyo, Harald n’umuryango we bagerageza kubaho mu buzima busanzwe; abana be biga mu mashuri ya leta, kandi umuryango ukunze kugaragara mu modoka zitwara abagenzi.
4. Umwamikazi wa Danemark, Margrethe wa II, ari nawe mwamikazi ubu umaze igihe kirekire ku butegetsi mu Burayi nyuma y’urupfu rw’Umwamikazi Elizabeth wa II, nk’uko byemezwa na Celebrity Net Worth, bivugwa ko afite umutungo wa miliyoni 40 z’amadolari. Leta ya Danemark imugenera amadolari 705.000 buri kwezi yo gucunga umutungo we no guhemba abakozi hiyongereyeho n’ibindi akenera ku giti cye.
5. Umwami wa Suede, Carl XVI Gustaf ngo afite umutungo wa miliyoni 70 z’amadolari. Uyu mutungo urimo n’ingoro ya Solliden, inzu y’umuryango ukoreramo ibiruhuko ku kirwa cya Oland kiri muri Baltique.
6. Umwami Willem-Alexander, uriho ubu mu Buholandi, bivugwa ko afite agaciro ka miliyoni 48 z’amadolari. Igikomangomakazi Beatrix, wari umaze imyaka isaga 30 ayobora ubwami mbere yo kuva ku ngoma mu 2013, bivugwa ko afite agaciro ka miliyoni 200 z’amadolari.
7. Umwami Charles III w’u Bwongereza, nyuma y’urupfu rw’umwamikazi Elizabeth wa II, yarazwe miliyoni 500 z’amadolari y’Amerika, bituma umutungo we ugera kuri miliyoni 660 z’amadolari. Charles afite kandi inshingano zo gucunga umutungo wa nyina, ufite agaciro ka miliyari 42 z’amadolari, nubwo atari uwe.
8. Umwami Abdullah II wa Yorodani ngo afite agaciro ka miliyoni 750. Amadolari arenga miliyoni 100 y’umutungo we ahujwe n’umutungo yaguze muri Amerika no mu Bwongereza mu myaka icumi ishize.
9. Igikomangoma Albert wa Monaco ngo afite agaciro ka miliyari imwe y’amadolari. Albert afite hafi kimwe cya kane cy’ubutaka bwo muri Monaco. Mu 2016, yaguze inzu nyina, wari n’umukinnyi wa filime, Grace Kelly, yakuriyemo muri Philadelphia ku madolari 754.000.
10. Emir Sheikh Tamim bin Hamad Al Thani wo muri Qatar bivugwa ko afite umutungo wa miliyari 1.2. Menshi muri ayo mafaranga ava mu kigo gishinzwe ishoramari cya Qatar (Qatar Investment Authority), gicunga peteroli na gaze by’igihugu.
11. Igikomangoma Hans Adam II wa Liechtenstein nkuko tubikesha Insider, afite umutungo ufite agaciro ka miliyari 3.5. Bwinshi muri ubwo butunzi buva muri LGT Group, banki yigenga ifitwe na Princely House of Liechtenstein. Prince Hans ahabwa buri mwaka 270.709$ yo gukoresha adasoreshwa.
12. Grand Duke Henri of Luxembourg ngo afite agaciro ka miliyari enye z’amadolari, bigatuma umuryango uba umwe mu miryango ikize mu Burayi. Mu gihe umuryango wa Grand Duke Henri utabona umushahara, ubona amadorari 325.000 yo kwishyura bimwe mu byo wakoresheje.
13. Umwami wa Maroc, Mohammed VI nk’uko Forbes ibivuga, bivugwa ko afite umutungo wa miliyari 5.7. Nyuma y’urupfu rwa se, Umwami Hassan, Mohammed yarazwe imigabane 35% muri Societe Nationale d’Investissement, isosiyete ifite imigabane muri bimwe mu bigo bikomeye byo muri Maroc.
14. Umwami Salman bin Abdulaziz Al Saud wo muri Arabia Saoudite ngo afite umutungo wa miliyari 17 z’amadolari. Mu mwaka wa 2018, Umuryango wa Saud wari ufite agaciro ka Tiriyali 1.4 z’amadolari ya Amerika, aho uyu mutungo munini ugabanyijwe hagati y’abagize umuryango 15.000, nubwo CNBC yatangaje ko ubutunzi bwinshi bufitwe n’abagera ku 2000 gusa muri bo.
15. Khalifa bin Zayed al Nahyan, Emir wa Abu Dhabi akaba yarahoze ari Perezida wa Let Zunze Ubumwe z’Abarabu, bivugwa ko afite agaciro ka miliyari 18 z’amadolari. Yabaye umuyobozi w’ikigo cy’ishoramari cya Abu Dhabi, gicunga ibigega bya peteroli bya UAE, bivugwa ko bifite agaciro ka miliyari zisaga 500$.
16. Sultan Hassanal Bolkiah, umuyobozi wa Brunei, ngo afite umutungo ubarirwa muri miliyari 20 z’amadolari. Aba mu ngoro nini ya mbere ku Isi, kandi ngo afite Rolls-Royces zirenga 600. Ubwinshi mu butunzi bwa Bolkiah buturuka mu bubiko bwa peteroli na gaze by’igihugu.
17. Umwami wa Thailand, Vajiralongkorn, ngo ashobora kuba ari we mwami ukize kurusha abandi ku Isi, aho bivugwa ko afite umutungo wa miliyari 30 z’amadolari.
