Inkingi y’icyuma yari yagaragaye bitazwi inkomoko yayo mu mahuriro y’imihanda muri Repubulika Iharanira Demukarasi ya Congo yashenywe n’abaturage bagize ubwoba ko batazi aho yavuye. Iyi nkingi yari mu Mujyi wa Kinshasa, yatewe amabuye nyuma iranatwikwa nk’uko BBC ibitangaza. Iyi nkingi ikimara kugaragara, yateje ibihuha ku mbuga nkoranyambaga, bamwe bavuga ko yazanwe n’inzego z’ubutasi ariko hari n’abari bayishimiye, baza kuyifotorezaho. Hari abaturage bavuga ko iyo nkingi yaba yarazanwe n’ibivejuru, abantu batazwi cyangwa ikaba ifite aho ihuriye na Illuminati cyangwa Freemason kuko ngo iteye nk’inyabutatu. Serge Ifulu utuye hafi aho iyo nkingi yabonetse, yabwiye REUTERS ko ” byabyutse bakayisanga aho. Byadutangaje cyane kuko iyo nyabutatu tuyumva muri Freemason cyangwa Illuminati.” Abayitwitse basanzemo imbere nta kintu kirimo, gusa umuyobozi mu gace kabonetsemo iyi nkingi, Babylon Gaibene yabwiye BBC ko ibice byayo babijyaniye abahanga ngo hasuzumwe inkomoko yayo. Inkingi nk’iyabonetse i Kinshasa, yabonetse muri California, Romania na Turukiya no mu butayu bwo muri Utah muri Amerika. Izi ngo ntibiba bizwi uwazihashyize n’impamvu yabyo kandi ngo nyuma y’igihe gito zirongera zikaburirwa irengero. Hari amakuru atavugwaho rumwe ko izi nkingi zaba zishingwa n’ibivejuru.
Abaturage basanze mu nda nta kintu kirimo/BBC
Kurikira ibiganiro n’ama Video binyura kuri Bwiza TV
