Elon Musk vuba aha ashobora kuba umuherwe wa mbere ku Isi wujuje miliyari 300$ mu mateka y’Isi arusha umukuriye hafi miliyari 100$.
Uyu muyobozi wa sosiyete ya Tesla, akaba n’umuherwe wa mbere ku Isi kuri ubu umutungo we wiyongereyeho miliyari 36$ kuwa Mbere ushize nyuma y’aho imigabane y’iyi sosiyete ikora imodoka zikoreshwa n’amashanyarazi izamutseho 12,7% nyuma y’uko ikigo gikodesha imodoka cya Hertz gitanze komande y’imodoka 100,000 kigomba kubona bitarenze impera za 2022.
Uku kuzamuka kw’umutungo mu munsi umwe niko kubaye ukwa mbere mu mateka ya Bloomberg Billionaires Index kandi ayo mafaranga angana n’ay’umuherwe wa 34 ku Isi.
Umutungo wa Musk wahise ugera kuri miliyari 289$ watumye arusha miliyari hafi 100$ uwahoze ari umuherwe wa mbere Jeff Bezos wabarirwaga miliyari 193$ kuwa Mbere nk’uko bitangazwa na Bloomberg.
Musk kandi arusha Warren Buffet uza ku mwanya wa 10 ku rutonde rw’abantu bakize kurusha abandi ku Isi, akayabo ka miliyari 184$, mu gihe arusha Bill Gates wa kane miliyari 150$.
Umutungo wa Musk ukaba umaze kuzamuka kurusha uwa sosiyete ya ya kabiri mu gukora imodoka, Toyota, ubarirwa muri miliyari 283$. Tesla ikaba yaratambutse bwa mbere kuri Toyota mu gaciro muri Nyakanga 2020 iza ku mwanya wa mbere.
