Umuvugizi wa Perezida Nkurunziza w’u Burundi, Karerwa Jean Claude avuga ko igikorwa cyo gutegura uzamusimbura mu matora azaba mu 2020 akigeze kure.
Ibi yabitangaje ku wa Gatanu tariki 28 Nzeri 2018, mu nama yahuje abavugizi b’inzego zitandukanye za Leta, inama yabereye mu Ntara ya Ruyigi. Karerwa yavuze ko igihe nikigera, Abarundi bazamumenya bityo akaba asaba n’indi mitwe ya polisi gutegura iki gikorwa kare cy’abazayihagararira.
Akomeza avuga ko iki gikorwa cyo gutegura uzasimbura Nkurunziza cyateguwe n’ishyaka CNDD- FDD ryari risanzwe rimutangaho umukandida mu matora y’umukuru w’igihugu, ariko yirinda gukomoza ku mazina y’ababa bateganywa.
Yagize ati “uzamusimbura yatangiye kumutegura cyera, mu bikorwa no mu bitekerezo, ariko iyo gutora bigeze bavugana n’inzego ziyoboye ishyaka agashyikirizwa inteko ikamwemeza, hari n’izindi nzira bicamo, akabona gutangazwa, igikorwa kigeze ku ntambwe ishimishije, abarundi ni babe bategereje”.
Abakeka ko Nkurunziza ashobora kuzaba Minisitiri wa Mbere, si ko Karerwa abibona, ati “ashobora kujya mu buhinzi n’ubworozi, ashobora kuba umutoza w’amakipe kuko ni umutoza wabigize umwuga, ashobora kandi kuba umuhuza mu bihugu biri mu ntambara mu gihe yaba yabisabwe n’amahanga,…”.
Dore abayobozi batanu bacyekwaho kuba yasimbura Nkurunziza, ni urutonde rwashyizwe hanze n’ikinyamakuru UBM News.
1.Gen Evariste Ndayishimiye:
Ndayishimiye w’imyaka 48 uvuka muri Komini ya Giheta, mu Ntara ya Gitega, hagati mu Burundi, ni umwe mu bantu binjiye mu mutwe FDD bwa mbere. Mu 1995. Ubu ni umunyamabanga wa CNDD FDD.
Azwiho byinshi muri iri shyaka, ngo yarokotse igitero cyagabwe ku banyeshuri b’Abahutu ba Kaminuza y’u Burundi cyagabwe na bagenzi babo b’abanyeshuri b’abahezanguni b’Abatutsi, ahita yinjira mu mutwe wa FDD wafashe ibirwanisho nyuma y’iyicwa rya perezida Melchior Ndadaye mu mpera z’umwaka wa 1993.
Mu myaka 10 y’intambara, Evariste yagiye agirwa komanda w’abarwanyi ba FDD mu duce dutandukanye, agenda azamuka mu ntera kugeza abaye umuyobozi w’ibiro bishinzwe gupanga no gutegura politiki y’urugamba. Nk’umuntu uvuga rikijyana mu ishyaka ngo nawe ahabwa amahirwe cyane yo kuba yazasimbura Nkurunziza mu matora.
2.Gen Silas Ntigurirwa:
Uyu musirikare ufite ipeti rya Liyetona jenerali mu gisirikare cy’u Burundi, asanzwe ari umuyobozi mukuru w’inama nkuru y’umutekano w’igihugu. Mu ishyaka CNDD FDD na we ngo ari mu bavuga rikijyana bityo akaba ahabwa amahirwe.
3.Gen Guillaume Bunyoni
:
Gen.Bunyoni, ubu ni Minisitiri w’Umutekano, yahoze ari umugaba mukuru w’Ingabo za CNDD FDD ikiri mu ishyamba, ndetse n’aho zifatiye ubutegetsi aba umuyobozi mukuru wa polisi yashinzwe nyuma y’intambara z’abaturage zabaye hagati ya 1993-2003, Bunyoni ngo afatwa nka nimero ya kabiri ku butoni imbere ya Perezida Nkurunziza kuva aho Adolphe Nshimirimana wari ushinzwe iperereza apfiriye.
4.Ntakarutimana Etienne:
Uyu mugabo asanzwe ari umuyobozi w’urwego rw’igihugu rushinzwe iperereza. Ubwo yahabwaga uyu mwanya mu mwaka wa 2015, izina rye ntabwo ryari rizwi cyane. Etienne ngo yabaye umuyobozi mu nyeshyamba za FDD mu 1994, ngo akaba yari azwi ku izina rya Steeve mu ishyamba, iri shyaka ritarafata ubutegetsi, na we ngo akaba ari ku rutonde rw’abarwanira umwanya.
5.Denise Bucumi:
Ku izina ry’ubuyobozi ni Denise Nkurunziza akaba ari umufasha wa Perezida Nkurunziza, uyu mubyeyi usanzwe azwiho gusenga cyane akaba ari na pasiteri, ashyirwa mu majwi y’abarimo guhatanira kuzahagararira ishyaka CNDD FDD mu matora y’umukuru w’igihugu.
