Ikipe ya Espoir FC yo mu karere ka Rusizi, yabaye ikipe ya gatatu izwi muri shampiyona y’ikiciro cya mbere mu Rwanda ihagaritse imishahara y’abakinnyi bayo, kubera ubukene bwatewe n’icyorezo cya Virusi ya Corona.
Mu ibaruwa iyi kipe yandikiye abakozi bayo (Bwiza yashoboye kubonera kopi), yababwiye ko “Uhereye ku wa 15 Mata 2020, amasezerano bagiranye na Espoir FC abaye ahagaritswe kugeza igihe ibikorwa bya siporo bizongera gusubukurwa.”
Bwiza.com yahamirijwe aya makuru na Kamuzinzi Godefroid uyobora Espoir FC, wavuze ko umushahara ari ‘ingurane y’akazi kakozwe’, muri iyi minsi abakinnyi ba Espoir bakaba ntacyo bari gukorera ikipe yabo ari yo mpanvu imishahara yabo yahagaritswe by’agateganyo.
Perezida Kamuzinzi yabishimangiye agira ati” Amasezerano twayahagaritse kubera ibihe turimo, murabizi ko ibikorwa bya Siporo byose byahagaze kubera COVID-19, izo mpamvu rero zatumye amasezerano yabo tuyahagarika kuko nta mirimo bari gukorera ikipe ya Espoir FC.
Iyi baruwa yasinweho na Kamuzinzi Godefroid uyobora Espoir FC, ivuga ko umushahara ari ‘ingurane y’akazi kakozwe’, muri iyi minsi abakinnyi ba Espoir bakaba ntacyo bari gukorera ikipe yabo ari na yo mpanvu imishahara yabo yahagaritswe.
Espoir FC ibaye ikipe ya gatatu izwi muri shampiyona y’ikiciro cya mbere mu Rwanda ihagaritse imishahara y’abakinnyi bayo kubera ubukene bwatewe n’ingaruka za Coronavirus.
Rayon Sports ni yo kipe yafashe iya mbere yo guhagarikira abakinnyi bayo imishahara, n’ubwo iki cyemezo cyateje urunturuntu hagati y’abakinnyi b’iyi kipe n’ubuyobozi bwayo, ibishobora gutuma bamwe mu bakinnyi bayisohokamo; n’ubwo nta wuzi aho bazerekeza.
Indi kipe ni Musanze FC yahagaritse imishahara y’abakinnyi bayo kugeza igihe shampiyona izasubukurirwa, gusa iki cyemezo na cyo hari abo kitanyuze muri iyi kipe barimo Umunya Musiri uyitoza.
Icyemezo cyo guhagarika imishahara byitezwe ko gikomereza no mu yandi makipe, bijyanye n’uko inzira yinjirizagamo amafaranga zose zafunzwe kubera Coronavirus.
