Inteko ishinga amategeko ya Ethiopia kuri uyu wa 22 Werurwe 2023 yakuye abarwanyi ba TPLF yo muri Leta ya Tigray ku rutonde rw’imitwe y’iterabwoba ikorera muri iki gihugu.
Ni umwanzuro watowe n’abashingamategeko benshi, ugeranyije n’abatawushyigikiye, nk’uko byatangarijwe ku rubuga rwa Facebook n’Inteko ishinga amategeko ya Ethiopia.
Iyi nteko yagize iti: “Inteko ishinga amategeko yemeye umwanzuro wo gukura kuri TPLF izina ry’iterabwoba, watowe ku bwiganze.”
TPLF yamaze imyaka ibiri ihanganye n’ingabo za Ethiopia ikuwe kuri uru rutonde hashingiwe ku myanzuro yafatiwe mu mishyikirano yahuje impande zombi, bigizwemo uruhare n’umuryango wa Afurika yunze ubumwe, AU.
Muri iyi myanzuro, TPLF yemeye guhagarika imirwano, kurambika intwaro no kuzishyikiriza Leta. Leta na yo yemeye kurinda umutekano w’abo muri Tigray n’imitungo yabo.
