Igisirikare cya Repubulika ya Demokarasi ya Congo (FARDC) cyamaganye byimazeyo ibirego by’umutwe witwaje intwaro wa MRDP-Twirwaneho, ukorera mu misozi ya Fizi, uherutse kuvuga ko abarwanyi ba FDLR bahuguriwe mu Burundi binjiye mu gihugu kugira ngo bice abaturage b’Abanyamulenge.
Mu itangazo ryashyizwe ahagaragara ku itariki ya 26 Nyakanga, Umuvugizi wa FARDC, Gen. Major Sylvain Ekenge, yavuze ko ibyo birego “bidafite ishingiro” kandi avuga ko ari ugushaka gukoresha abantu hagamijwe kuyobya abaturage no kubangamira imihate yo gushaka amahoro ikomeje, cyane cyane i Washington na Doha.
Ku rundi ruhande, FARDC ivuga ko yagenzuye amakuru ku bwicanyi bwateganijwe muri Minembwe (Kivu y’Amajyepfo), bwateguwe na Twirwaneho ifatanyije na Red Tabara, undi mutwe witwaje intwaro ukorera muri ako karere urwanya ubutegetsi bw’u Burundi.
Nk’uko bigaragara mu itangazo rigenewe abanyamakuru rya FARDC, iyi gahunda igamije guteza amakimbirane mpuzamahanga bigashinjwa Guverinoma ya Congo n’u Burundi.
Mu guhangana n’iki kibazo, Igisirikare cya Congo kivuga ko cyamaganye imigambi y’ubugizi bwa nabi bw’iyo mitwe yitwaje intwaro no kubangamira ibikorwa byo kugarura amahoro mu burasirazuba bw’igihugu.
