Mu Murenge wa Kamubuga mu Karere ka Gakenke baravuga ko hari zimwe muri serivisi batabasha kubona bitewe n’uko ibyiciro by’ubudehe bigikoreshwa iwabo ubuyobozi bw’akarere bukaba buvuga ko bwihaye umukoro wo kwibutsa abayobozi bo mu nzego z’ibanze guhagarika iyo mikorere.
Abaturage bo muri uyu murenge wa Kamubuga bavuga ko ibyiciro by’ubudehe bikoreshwa bigashingirwaho mu kubaha serivise runaka, bigatuma hari izo bavutswa.
“Hari imirasire bazanye y’abantu badafite imiriro barangije baravuga ngo umuntu uri mu cyiciro cya mbere aratanga ibihumbi 5, uri mu cya kabiri nawe bagira ayo bagena, n’uri mucya gatatu,” uyu ni umwe mu baturage wavuganye na Isango Star dukesha iyi nkuru.
Mugenzi we yunzemo agira ati “Tujya kwivuza bakakubaza ngo uri mu kihe cyiciro nuko ukavuga icyiciro urimo.”
Yakomeje agira ati “Twebwe baratubwiye ngo ibyiciro byarahindutse! Ubuse ugeze ku muyobozi akakubwira ngo uri mucya kangahe biba bishatse kuvuga iki? Ujya gushaka serivise wagerayo bati uri mucya kangahe?! Ukavuga uti ko byahinduwe mutubaza icyiciro gute?”
Aba baturage barasaba ko ibyiciro by’ubudehe byakurwaho nk’uko ahandi byagenze.
“Mbese n’inaha ubuvugizi buhagere, ibyiciro by’ubudehe bihave burundu, tumenye ngo twese turi Abanyarwanda b’igihe kimwe.”
Uwahoze ari Umuyobozi w’agateganyo w’Akarere ka Gakenke, Niyonsenga Aime Francais; ngo yari yavuze ko ubuyobozi bwihaye umukoro wo gukurikirana no gusobanurira abayobozi bakibikora ko batagomba gutanga serivise bashingiye ku byiciro by’ubudehe kuko byakuweho.
