Amakuru aturuka muri Repubulika Iharanira Demokarasi ya Congo, avuga ko Jenerali Afurika Jean Michel wayoboraga inyeshyamba za RUDI URUNANA, ziherutse kugaba igitero mu Rwanda zikica abaturage 14, yakomerekejwe bikomeye n’ingabo za FARDC, abari bamurinze 14 bahasiga ubuzima.
Ni amakuru aturuka muri Gurupoma ya Binza,Teritwari ya Rutchuru ahitwa Gasharu, akavuga ko ku wa Mbere tariki ya 14 Ukwakira 2019, ahagana saa kumi n’ebyiri z’umugoroba aribwo inyeshyamba za RUD URUNANA zatezwe agaco n’Ingabo za FARDC zibumbiye muri Operation ZOKOLA 2, zimisha urusasu mu nyeshyamba zarimo Komanda wazo Afurika Jean Michel, 14 bahita bahasiga ubuzima.
Sosiyeti sivile yo muri aka gace yatangarije ikinyamakuru Rwandatribune.com dukesha iyi nkuru ko Jenerali Afurika Jean Michel yahakomerekeye bikabije ingabo za FARDC zikaba zirigushakisha aho yahungishirijwe.
Ingabo za FARDC zikomeje guhashya uyu mutwe wa RUD URUNANA muri Binza, ubu ngo ukaba umaze kwamburwa uduce twa nyuma wari usigaranye harimo; Gafuru, Giseguro, Katanga na Mikotokoto, izi nyeshyamba zikaba ziri guhunga zerekeza Katwiguru na Kirama mu birindiro bya FDLR .
Umutwe wa RUD URUNANA ni mwe mu nyeshyamba za P5 ziherutse kugaba igitero mu kinigi zikica abasivili abandi bagakomereka, mu bagabye iki gitero 19 baguye mu gikorwa cya RDF cyo guhiga abo barwanyi abandi barafatwa.
Brig. Gen. Afurika Jean Michel amazina ye y’ukuri ngo ni Juvenal Musabyimana yavutse 1967 mu cyahoze ari Komini Giciye, yize amashuri yisumbuye muri College Inyemeramihigo ku Gisenyi ahita ajya mu ishuri rya Gisirikare ESM mu cyiciro cya 31 arangiza ari sous-Lietenant.
Yayoboye itsinda rito rya gisirikare “Platoon” nyuma yo guhungira Kibumba, intambara itangiye muri Zaire ahungira Tingi Tingi aho yakomereje yerekeza Congo Brazaville mu Nkambi ya Loukolela yanayoboye.
Mu 1998 yahamagawe i Kinshasa gufasha ubutegetsi bwa Perezida Desire Kabila na bwo agirwa umuyobozi mu ishuri ritoza abasirikare i Kinshasa ahava yerekeza i Gakoma muri Equateur.
Uyu musirikare ngo yoherejwe mu kazi muri Katanga ari S4 (urwego rushinzwe guhuza abasirikare n’abasivile) muri batayo yitwa “Foudre” (Inkuba) mu gace ka Kapona ahava ajyanwa muri batayo ya Samurai nabwo agirwa S4 ahitwa Luwama, ahava ajya kuba S5 ahitwa Kilembwe aho yavuye yiyunga kuri RUD URUNANA.
Â
