General Jeph Masiloga wari umwe mu bayobozi bakuru b’umutwe witwaje intwaro ya Nyatura Abazungu yiciwe muri teritwari ya Masisi, intara ya Kivu y’Amajyaruguru muri Repubulika ya Demukarasi ya Congo (RDC).
Amakuru agera kuri BWIZA avuga ko Gen. Masiroga yiciwe n’abarwanyi ba Nyatura barwanyaga ubutegetsi bwe bayobowe na Gen. Nyeganyega mu gace ka Kausa tariki ya 29 Ugushyingo 2022, nyuma yo gusubiranamo.
Aya makuru avuga ko Masiroga yatezwe igico, acibwa umutwe, amaze kwicwa habaho kurasana kw’abamushyigikiye n’abamurwanya, hapfamo barindwi, abandi batatu barakomereka.
Gen. Masiroga ngo yishwe mu gihe yiteguraga kugaba ibitero ku mutwe witwaje intwaro wa M23 uri kurwanira muri teritwari ya Rutshuru, hafi ya Masisi.
Nyatura Abazungu ivugwa mu ihuriro ry’imitwe yitwaje intwaro yifatanya n’ingabo za RDC mu kurwanya M23 kuva yubura intwaro mu mpera z’umwaka ushize kugeza ubu.
