Umugaba Mukuru w’ingabo z’u Rwanda, General Jean Bosco Kazura, hamwe na bagenzi be bayobora ingabo z’ibihugu bigize umuryango wa Afurika y’iburasirazuba (EAC) bahuriye i Dar es Salaam muri Tanzania.
Iyi nama yayobowe n’Umugaba Mukuru w’ingabo z’u Burundi, Lt Gen. Prime Niyongabo, yabaye tariki ya 16 Ukuboza 2022. Abandi bari bayirimo ni: Gen. Wilson Mbadi wo muri Uganda, Lt Gen. Christian Tshiwewe wo muri RDC, Gen. John Mukunda wo muri Tanzania na Gen. Robert Kibochi wa Kenya.
Gen. Kazura yaherekejwe muri Tanzania n’Umuyobozi Mukuru w’urwego rw’igisirikare rushinzwe ubutasi, Maj. Gen. Vincent Nyakarundi.
Ibiro by’ingabo z’u Burundi bisobanura ko muri iyi nama, abagaba bakuru baganiriye ku buryo bwo kugarura amahoro mu burasirazuba bwa RDC.
Biti: “Umukuru wa FDNB, General Prime Niyongabo tariki ya 16/12/2022 yayoboye inama y’abagaba bakuru b’ibihugu bigize EAC, i Dar es Salaam muri Tanzania. Baganiriye ku nzira n’uburyo bwo kugarura amahoro mu burasirazuba bwa RDC.”
Aba basirikare bakuru bahuriye mu nama nyuma y’aho n’abakuru b’ibihugu bigize EAC bahuriye i Washington DC muri Leta zunze ubumwe za Amerika, bakaganira ku kibazo cyo muri RDC. Bari bagiye muri iki gihugu mu nama yagihuje n’ibindi byo ku mugabane wa Afurika.
