Umugaba Mukuru w’ingabo z’u Burundi, General Prime Niyongabo, yahaye impanuro abasirikare bagiye mu ntara ya Kivu y’Amajyaruguru muri Repubulika ya demukarasi ya Congo (RDC) kuri uyu wa 4 Werurwe 2023.
Nk’uko Gen. Niyongabo yari yabimenyesheje Umunyamabanga Mukuru w’umuryango wa Afurika y’iburasirazuba (EAC), Dr Peter Mathuki, aba basirikare bagiye muri Kivu y’Amajyaruguru kuri uyu wa 4 Werurwe.
Igisirikare cy’u Burundi kuri uyu wa 3 Werurwe cyatangaje ko mbere y’uko bagenda, uyu Mugaba Mukuru yabaganirije, abasaba kuzangwa n’imyitwarire myiza, ubumwe n’ubunyamwuga.
Iki gisirikare cyagize kiti: “General Niyongabo yaganirije abasirikare biteguraga kujya muri Kivu y’Amajyaruguru gutanga umusanzu mu kugarura amahoro n’umutekano. Yabasabye kwimakaza imyitwarire myiza, ubumwe n’ubunyamwuga.
Byateganyijwe ko aba basirikare baraba bari ku cyicaro cy’ingabo za EAC ziri muri RDC giherereye i Goma, mu gihe bategereje kujya muri teritwari ya Masisi. Ni bo bazaba bahagenzura ubwo abarwanyi b’umutwe witwaje intwaro wa M23 bazaba bamaze kuhava.
