Général Major Bruno Mpezo, Komanda w’Akarere ka 34 ka gisirikare muri Kivu y’Amajyaruguru, yatawe muri yombi kuri uyu wa Gatandatu ushize afatiwe i Goma ashinjwa ibyaha birimo gukorana na FDLR kandi byarabujijwe.
Aya makuru y’ifatwa rya Gen Mpenzo yemejwe n’Umuvugizi wa FARDC, Gen. Sylvain Ekenge mu itangazo yasomeye kuri televiziyo y’igihugu.
Ati : « uyu mujenerali mukuru ntashinjwa gusa imicungire mibi y’abakozi n’ibikoresho bya gisirikare ashinzwe, ahubwo anashinjwa kurenga ku mabwiriza ajyanye no kubuza abagize ingabo z’igihugu, ipeti ryose yaba afite, gufatanya n’ingabo za FDLR, »
Yongeyeho ko ubutabera bwa gisirikare bwitabajwe ngo bukurikirane byimbitse iyo dosiye, ndetse ko FARDC izakomeza kubaha amabwiriza y’umugaba mukuru wa FARDC yo ku itariki ya 21 Ugushyingo 2023, yongera gushimangira ko bibujjwe gukorana n’umutwe wa FDLR ugizwe n’inyeshyamba z’Abanyarwanda zirimo abasize bakoze jenoside mu Rwanda.
