GS Saint Paul Muko: Ubufatanye n’ababyeyi bwahesheje abana gutsinda mu buryo budasanzwe

Ishuri GS Saint Paul Muko ryo mu murenge wa Bugarama mu karere ka Rusizi riravugwaho gutsindisha abana bigaga mu cyiciro rusange cy’amashuri yisumbuye mu buryo budasanzwe, bikanavugwa ko ryaba ari ryo ryonyine ry’uburezi bw’ibanze mu gihugu ngo ryakoze ibisa n’ibitangaza nk’uko byemezwa n’ubuyobozi bushinzwe uburezi muri aka karere, aho mu bana 124 bakoze ikizamini cy’icyiciro rusange cy’ayisumbuye,bose babonye amabaruwa abajyana mu bigo bicumbikira abana birimo na Gashora Girls’school, abaharangije abanza na bo ngo bagakora neza aho 38 babonye amabaruwa abajyana mu bicumbikira abana, ubuyobozi bw’ishuri bukavuga ko uyu musaruro buwukesha ubufatanye busesuye n’ababyeyi.

Nk’uko Bwiza.com yabitangarijwe n’umuyobozi w’iri shuri padiri Uwingabire Emmanuel ubwo ryo,ababyeyi,abana baharangije n’abayobozi batandukanye ku rwego rw’umurenge wa Bugarama n’Akarere bishimiraga iyi ntsinzi, ngo ibonetse nyuma y’urugamba rukomeye rw’ubuyobozi,ababyeyi n’abarezi rwo gufasha abanyeshuri gutegura neza ibizamini bya Leta,bakaba ngo bari biyemeje gukora ibitazakorwa n’irindi shuri ry’uburezi bw’ibanze bw’imyaka 9 na 12 mu gihugu hose, aho abana biga bataha,bakishimira ko babigezeho,agahamya ko nta rindi shuri mu gihugu ryo muri uru rwego ryakoze nk’ibi kuko babajije mu nzego zose z’uburezi bakaribura, bikaba ari ibyo kwishimirwa cyane.

Ati’’ Twakoze dushaka kwerekana ko n’aya mashuri afite imbaraga n’ ubushobozi bwo gukora ibitangaza iyo ayobowe neza, hari ubufatanye busesuye hagati y’ababyeyi,abana n’izindi nzego zose zirebwa n’uburezi mu karere, aho mu bana 124 dufite bakoze ikizamini gisoza icyiciro rusange cy’ayisumbuye, bose 100%, nta n’umwe uvuyemo babonye amabaruwa abajyana mu mashuri acumbikira abana harimo n’irya Gashora Girls’school namwe muzi abana bakira uko baba bahagaze mu bwenge, mu mashuri abanza na ho abana 196 bakoze bagatsinda bose,38 muri bo bakabona amabaruwa nk’ayo, tubona bidasanzwe, ni amateka kuri iri shuri kuko nta bundi byigeze bihaba.’’

Abajijwe icyakozwe ngo babigereho ati’’ Turabikesha ubufatanye busesuye bw’ababyeyi n’izindi nzego zirebwa n’uburezi muri aka karere kuko bumvize intego n’icyerekezo cyacu baradushyigikira,ababyeyi bagasura abana buri gihe ku ishuri, barabareka biga neza nta mbogamizi zindi,ibyo basabwa barabitunganya buri wese ahagarara neza ku ruhande rwe none uyu munsi turishimye. Turiyemeza kutazahinyuka, twanihaye intego yo kuza mu mashuri 10 ya mbere atsindisha neza mu gihugu hose uyu mwaka, tukagira umwana uza mu 10 ba mbere mu gihugu kandi twumva abakoze ibi n’ibindi ku bufatanye bitazatunanira.’’

Bushayija JMV uhagarariye ababyeyi baharerera yavuze ko nyuma yo kwicarana n’ubuyobozi bw’ishuri bakaganira ku cyerekezo bashaka guha abana babo, bakemeranya ko ari urugamba bagomba kurwana bose ntawe usigaye, buri wese yakoresheje imbaraga ku ruhande rwe n’abana babyumva kimwe na bo, bakishimira ko bageze ku cyo baharaniye.

Ati’’ Tumaze kuganira ku cyerekezo dushaka guha ishuri ryacu nk’ababyeyi, icya mbere twakoze ni ugushakira amacumbi abarezi bose b’ingaragu bakigisha bataha heza twishatsemo nk’ababyeyi, tubaha agahimbazamusyi aho uwigisha ayisumbye wese ahabwa 35.000 mu kwezi,uw’abanza agahabwa 15.000, abarimu bose bakagaburirwa ku ishuri saa yine na saa sita tunabashakira amazi meza banywa, n’abana bose bakarya ,umubyeyi ugaragaje ubushobozi buke abandi tukamufasha, tunemerera abarezi amafaranga menshi y’inyongera ajyanye n’uko buri wese yatsindishije, turabatengamaza,tubasaba umusaruro none barawuduhaye turishimye cyane.’’

Avuga ariko ko nubwo bishimye , bababajwe n’uko nk’isomo ry’ubugenge umwarimu waryo yabonetse bitinze cyane bibadindiriza abana ntibaribonamo amanota ahagije, agasaba MINEDUC kujya yohereza abarimu kare kuko kubohereza bitinze ntacyo bibamarira, akanasaba ko amashuri nk’aya yakwitabwaho by’umwihariko cyane cyane nk’iryabo ryigisha amasiyanse, Laboratwari na za mudasobwa bikaba bihagije, ibindi ngo bazahora ku isonga.

Bazizane Soleil wahize abandi muri iri shuri mu cyiciro rusange,akagira Aggregate 9 akaba mu boherejwe muri Gashora Girls’ schhol,ati’’ Twaje mu mashuri nk’aya baduca intege ngo ntatsindisha kuko nahereye mu wa mbere mba uwa mbere kugeza ubu, mu gutsindira kujya mu ricumbikira abana ubushobozi buba buke ngaruka aha. Umutima wo gukunda ishuri no kwigana umwete badushyizemo tugatsinda dutya ni wo tujyanye aho tugiye kandi turizeza guhagararira iri shuri neza tukazarihesha icyubahiro aho tuzajya hose.’’

Mu byishimo bidasanzwe,se w’uyu mukobwa witwa Ngurinzira Gratien wavuze ko ahora ababazwa n’uko na we yatsinze icya Leta ari uwa mbere mu cyari komini Kamembe akabura ubushobozi bwo kijya mu yisumbuye akunda ishuri cyane, ngo yishimiye ko umwana we ageze ikirenge mu cye.

Ati’’ Natsinze amashuri abanza ndi uwa mbere mu cyari komini Kamembe cyose mbura ubushobozi sinagana ayisumbuye, mu mubabaro nagize icyo gihe ngira n’intego y’uko abo nzabyara nzaharanira ko biga neza nkabafasha mu bishoboka byose. Mbigezeho,umwana wanjye kimwe n’abamukurikira baziga, n’ayo ntize ndi umuhanga bayige,aho nababaye hahinduke ibyishimo, nubwo ubushobozi bwanjye bwo kugira ngo yige muri Gashora Girls’ scool ari buke ariko nzemera mburare yige neza kuko najye ampesheje icyubahiro.’’

Iri shuri ryashinzwe mu 1998 ryigwamo n’abana 3200 barimo 978 biga mu yisumbuye, ryari rifite amashami y’imibare,ubutabire n’ibinyabuzima; n’amateka ubukungu n’ubumenyi bw’isi, nyuma yo kubona ko abana baho bakunda amasiyanse banayatsinda cyane,bakaba banahawe amashami yandi 2 mashya,iry’ubugenge,ubutabire n’ibinyabuzima,n’ibinyabuzima ubutabire n’ubumenyi bw’isi.

Ushinzwe uburezi bw’amashuri abanza n’ayisumbuye muri aka karere Nteziyaremye Jean Pierre, yashimiye ababyeyi barimo uwitwa Nkinzingabo Amiru washimiwe by’umwihariko kuba indashyikirwa mu gukurikirana abana ku ishuri byatumye abo ahafite 2 batsinda neza ikizamini cy’abanza,anashimira abarezi aho buri murezi yahaweibahasha ibyimbye bijyanye n’uko yatsindishijemu isomo yigisha.

Asaba buri mubyeyi gushyira imbere imyigire y’abana kuko kugaburira umwana no kumuha ibikoresho by’ishuri byonyine bidahagije ngo yige neza, na we yishimira ibyakozwe n’iri shuri avuga ko nta rindi shuri nk’iri yabyumvisemo muri uyu mwaka, abasaba kongera imbaraga nk’uko babyiyemeje uyu mwaka utangiye bakazarushaho.