Guverinoma y’u Bwongereza mu cyumweru gitaha irajya mu rukiko rw’ikirenga, igaragaze uburyo gahunda yayo yo kohereza abimukira mu Rwanda iri mu buryo bukwiye kandi bwihutirwa bwo gukemura ikibazo cy’iyimuka ritemewe n’amategeko.
Ibiro ntaramakuru by’Abongereza, Reuters, byatangaje ko abanyamategeko b’iyi guverinoma iyobowe na Minisitiri w’Intebe, Rishi Sunak, bazagaragariza urukiko rw’ikirenga impamvu zifatika zatuma rutesha agaciro icyemezo cy’urukiko rw’ubujurire gikumira iyi gahunda, cyafashwe muri Kamena 2023.
Ibi biro byagize biti: “Ku wa Mbere, abanyamategeko ba guverinoma bazemereza mu rukiko rw’ikirenga ko iki cyemezo kitari gikwiye, mu gihe abahagarariye abimukira baturutse muri Syria, Iraq, Iran, Vietnam na Sudani bashaka ko abacamanza banzura ko iyi gahunda idakwiye.”
Umunyamabanga cyangwa Minisitiri ushinzwe umutekano w’imbere, Suella Braverman, tariki ya 3 Ukwakira 2023 yatangarije abagize ishyaka Conservative riri ku butegetsi ko uruvunganzoka rw’abimukira rushobora kuzinjira mu gihugu cyabo mu gihe guverinoma itakwemererwa gushyira mu bikorwa iyi gahunda.
Ni mu gihe Sunak, tariki ya 4 Ukwakira 2023 yatangaje ko iyi gahunda itica amategeko mpuzamahanga arengera abimukira, kandi ko nibatangira kujyanwa mu Rwanda, ubwato busanzwe bubajyana mu Bwongereza buzacika.
Sunak yagize ati: “Nizeye ko ubwo indege zizatangira kujya mu Rwanda, ubwato buto butazongera kuza. Nizeye ko iyi gahunda yubahiriza inshingano zacu mpuzamahanga. Ariko mumenye ibi, nzakora ibishoboka byose, mpagarika ubu bwato.”
Amasezerano yo gushyira mu bikorwa iyi gahunda yashyizweho umukono muri Mata 2022. Icyo gihe guverinoma y’u Bwongereza yari iyobowe na Boris Johnson, Minisitiri w’umutekano w’imbere yari Priti Patel.
