Ofisi ya Mwendesha Mashtaka katika ngazi ya kati ya Huye inawashtaki watu watano — wanaume wanne na mwanamke mmoja — wanaoshukiwa kushirikiana kumuua mwanaume wa miaka 57 aliyekuwa akifanya kazi ya ulinzi, kwa kumkata shingo.
Tukio hilo linadaiwa kutokea usiku wa tarehe 7 Juni 2025, majira ya saa nne usiku, katika Kijiji cha Ngoma III, Kata ya Ngoma, Tarafa ya Ngoma, Wilaya ya Huye, ambapo mwili wa marehemu ulipatikana ndani ya nyumba aliyokuwa akiishi, kwa mujibu wa taarifa kutoka kwa Ofisi ya Taifa ya Mashtaka.
Wakati wa mahojiano, washukiwa ambao walikuwa wakifanya kazi katika kampuni moja ya ulinzi pamoja na marehemu, walieleza kuwa msimamizi wao aliwaita na kuwapeleka nyumbani kwa marehemu. Walivunja mlango, wakamvizia ndani. Aliporudi na kutaka kuwasha taa, walimvamia na kumpiga chini, na mmoja wao akamkata shingo. Baadaye walifunga mlango na kutoweka. Mwili wake ulipatikana baada ya siku mbili.
Walieleza kuwa sababu ya mauaji hayo ilikuwa mzozo kati ya marehemu na msimamizi wao, pamoja na mwanamke wanayedai alikuwa na uhusiano wa kimapenzi naye. Msimamizi na mwanamke huyo wanashukiwa kupanga njama hiyo na kuwahusisha wenzao. Washukiwa wote wameomba msamaha.
Iwapo watapatikana na hatia ya kosa la mauaji, kila mmoja wao atahukumiwa kifungo cha maisha, kulingana na Kifungu cha 107 cha Sheria Na. 68/2018 ya tarehe 30/08/2018 inayoelezea makosa na adhabu kwa ujumla.
