Ikigo cy’Igihugu cy’Ibarurishamibare mu Rwanda cyashyize hanze igipimo cy’ihindagurika ry’ibiciro mu kwezi kwa Mata 2017, kigaragaza ko byagiye byiyongera mu mijyi no mu cyari ugereranyije n’umwaka ushize.
Imibare isohorwa iba ari igipimo ngenderwaho cyifashishwa mu bukungu bw’u Rwanda kiboneka hifashishijwe gusa ibiciro byakusanyijwe mu mijyi.
Ibiciro mu mijyi.
Ibiciro mu mijyi byiyongereyeho 7,3% mu kwezi gushize kwa Mata 2017 ugereranyije na Mata 2016, mu gihe ihinduka ry’ibiciro mu Rwanda muri Werurwe 2017 ryari ku kigereranyo kingana na 7,7%.
Bimwe mu byatumye ibiciro bizamukaho 7,3% mu kwezi kwa Mata ni ibiciro by’ibiribwa n’ibinyobwa bidasembuye byazamutseho 15,8%, ibiciro by’inzu , amazi, amashanyarazi, gazi n’ibindi bicanwa byazamutseho 2,2% n’ibiciro by’ibijyanye n’ubwikorezi byazamutseho 6,1%.
Iyo ugereranyije Mata 2017 na Mata 2016, usanga ibiciro by’ibintu bitarimo ibiribwa n’ibikomoka ku ngufu byarazamutseho 4,8%.Wagereranya ukwezi kwa Mata 2017 n’ukwezi kwa Werurwe 2017, ibiciro byazamutseho 0.4%.
Iri zamuka rikaba ryaratewe n’ibiciro by’ibiribwa n’ibinyobwa bidasembuye byazamutseho 0,5% n’ibiciro by’inzu , amazi, amashanyarazi, gazi n’ibindi bicanwa byazamutseho 0,3%.
Ibiciro mu byaro nabyo byarazamutse
Mu kwezi gushize kwa Mata 2017 ibiciro mu byaro byiyongereyeho 15,9% ugereranyije na Mata 2016. Muri Werurwe 2017 ryari ku kigereranyo kingana na 15,7%.
Bimwe mu byatumye ibiciro bizamukaho 15,9% mu kwezi kwa Mata ni ibiciro by’ibiribwa n’ibinyobwa bidasembuye byazamutseho 25,5% n’ibiciro by’ibijyanye n’uburezi byazamutseho 52,0%.
Iyo ugereranyije Mata 2017 na Werurwe 2017, ibiciro byazamutseho 0,7%.
Iri zamuka ahanini ryatewe n’izamuka ry’ ibiciro by’ibiribwa n’ibinyobwa bidasembuye byazamutseho 0,9%.
Ibiciro bikomatanyirijwe nabyo byarazamutse
Mu kwezi kwa Mata 2017 ibiciro mu Rwanda byiyongereyeho 12,9% ugereranyije na Mata 2016. Muri Werurwe 2017) byiyongereyeho 13,0%.
Bimwe mu byatumye ibiciro byiyongeraho 12,9% mu kwezi kwa Mata 2017 ni ibiciro by’ibiribwa n’ibinyobwa bidasembuye byazamutseho 23,4%, ibiciro by’ibijyanye n’ubwikorezi byazamutseho 4,3% n’ibiciro by’ibijyanye n’uburezi byazamutseho 23,6%.
Iyo ugereranyije na Mata 2017 na Werurwe 2017,ibiciro byazamutseho 0,6%.
Iri zamuka ahanini ryatewe n’izamuka ry’ ibiciro by’ibiribwa n’ibinyobwa bidasembuye byazamutseho 0,8%.
Kanda hano ujye ubona amakuru yihuse kandi kugihe kuri Facebook no kuri twitter
Ntakirutimana Deus/Bwiza.com
