U Rwanda n’u Burusiya ku wa Kabiri tariki ya 19 Gashyantare byashyize umukono ku masezerano y’ubwumvikane agamije guteza imbere ubufatanye mu rwego rw’ubuzima.
Igikorwa cyo gusinya aya masezerano cyabereye iruhande rw’Inteko Rusange y’Ishami ry’Umuryango w’Abibumbye ryita ku Buzima.
Ku ruhande rw’u Burusiya amasezerano yashyizweho umukono na Minisitiri w’Ubuzima wa kiriya gihugu, Mikhail Murashko, mu gihe ku ruhande rw’u Rwanda yasinywe na Minisitiri w’Ubuzima, Dr. Sabin Nsanzimana. Ni nyuma y’ibiganiro bombi bagiranye byibanze ku gushimangira imikoranire hagati y’ibihugu byombi.
Nk’uko byatangajwe na Minisiteri y’Ubuzima y’u Burusiya, aya masezerano agamije “guteza imbere ubufatanye mu nzego zitandukanye zirimo gushimangira gahunda z’ubuzima, kongerera ubushobozi abakozi bo mu rwego rw’ubuvuzi, gukumira no kuvura indwara zandura n’izitandura, ndetse n’ubushakashatsi mu by’ubuvuzi.”
Impande zombi zanemeranyije gukorana mu bijyanye no kugenzura no gutunganya ikoreshwa ry’imiti n’ibikoresho byo kwa muganga, guteza imbere ubuzima bw’umubyeyi n’umwana, no kugabanya impfu z’abana n’iz’impinja.
Aya masezerano anagaragaza ubushake bw’ibihugu byombi bwo gukorana mu rwego rw’ubuvuzi bukoresha ikoranabuhanga rya nucléaire, kimwe n’izindi nzego zigezweho mu buvuzi.
Isinywa ry’aya masezerano rije rikurikira umubano umaze igihe wifashe neza hagati y’u Rwanda n’u Burusiya mu nzego zitandukanye zirimo uburezi, ikoranabuhanga n’ubuzima, aho impande zombi zikomeje gushimangira ubufatanye bugamije iterambere ry’abaturage b’ibihugu byombi.
