Urukiko rw’ubujurire rwo mu Burundi rwashimangiye igifungo cy’imyaka 10 urukiko rwisumbuye rwakatiye umunyamakuru Floriane Irangabiye.
Uyu Murundikazi yafatiwe ku kibuga mpuzamahanga cya Bujumbura mu mpera za Kanama 2022, ubwo yari avuye mu Rwanda, aho yari amaze igihe kinini ahaba nk’impunzi. Icyo gihe yari agiye gusura umuryango we.
Urukiko rwisumbuye rwa Mukaza tariki ya 3 Mutarama 2023 rwamuhamije icyaha cyo kubangamira umutekano w’igihugu, rumukatira gufungwa imyaka 10 no gutanga ihazabu y’amafaranga miliyoni 1 y’Amarundi.
Ikatirwa rye ryateje impaka, umuryango w’abanyamakuru ndengamupaka, RSF, ugaragaza ko iki kirego gishingiye ku mwuga w’itangazamakuru yakoraga, usaba ko arekurwa byihuse nta kigendeweho. Minisiteri y’ubutabera yamenyesheje abantu ko urubanza rwajuririwe, isaba ko bategereza umwanzuro w’urukiko rw’ubujurire.
Urukiko rw’ubujurire kuri uyu wa 2 Gicurasi 2023 rwahaye ishingiro icyemezo cy’urukiko rwisumbuye kuri uru rubanza, rushimangira ko igifungo Irangabiye yakatiwe n’ihazabu yaciwe bigomba kugumaho.
