Igisasu umutwe w’iterabwoba wa Al Shabaab wateze mu gace ka Lamu ko muri Kenya hafi y’umupaka uyihuza na Somalia, cyishe abarwanyi bayo 15.
Umuvugizi w’ingabo za Kenya, Esther Wanjiku yatangarije Nation ko abarwanyi b’uyu mutwe bateze iki gisasu gitabwa munsi y’ubutaka ku muhanda uri muri aka gace, bagenzi babo bari mu modoka kiza kubaturikana mu masaa tatu y’uyu wa 26 Nzeri 2021.
Yagize ati: “Ndemeza ko hapfuye abarwanyi 15 ba Al Shabaab. Bari mu matsinda abiri. Rimwe muri aya matsinda ryatabye igisasu, irindi tsinda riza kugikandagira. Ntabwo bari bazi ko kihateze. Imodoka yabo yaturitse, abarimo bose barapfa.”
Wanjiku yavuze ko bishimishije kuba aba barwanyi bapfuye, anemeza ko ingabo za Kenya ziteguye gukomeza guhangana n’abasigaye. Yabivuze abasirikare bamaze kugera mu gace katezwemo iki gisasu, zihakorera uburinzi.
