Guverinoma y’u Rwanda yashyizeho ikipe igomba gukora iperereza ryimbitse ku mpamvu yateye inkongi y’umuriro yibasiye laboratwari y’Ibitaro by’Icyitegererezo bya Kibagabaga ku gicamunsi cyo kuwa Gatatu ushize.
Iperereza ry’ibanze ryari ryagaragaje ko iyi nkongi yatewe n’umuriro w’amashanyarazi.
Ariko abayobozi b’ibitaro mu itangazo ryashyizwe ahagaragara bavuze ko hashyizweho itsinda rigizwe n’impuguke zo mu Rwego rw’Igihugu rw’Ubugenzacyaha (RIB), izo mu Kigo cy’Igihugu gishinzwe Ingufu (REG), n’izo mu Kigo cy’Igihugu gishinzwe Ubuzima (RBC) ngo hemezwe neza icyateye iyo nkongi.
Nta muntu iyi nkongi yatangiriye muri laboratwari y’ibitaro yahitanye cyangwa ngo ikomeretse.
Umuyobozi Mukuru w’ibi bitaro, Ernest Munyemana ahishura ko hashyizweho iri tsinda yagize ati “Nta muntu wapfuye cyangwa ngo akomereke”
Ubuyobozi bw’ibitaro ariko nk’uko tubikesha The New Times buvuga ko ibikoresho bimwe nka mudasobwa eshatu za desktops, na mudasobwa ngendanwa eshanu, printers 12, UPS umunani na router biri mu byahiye.
Polisi yabashije kuhagera byihuse ibasha kuzimya inkongi itarakwira ahantu hose. Serivisi za laboratwari ariko zahise zihagarara mbere y’uko itsinda rya RBC ryihuta rigashyiramo ibindi bikoresho bimwe nk’umupangu wa kabiri (Plan B) nk’uko Munyemana yabivuze.
Ibitaro kandi byazanye bimwe mu bikoresho bivanye mu Kigo Nderabuzima cya Kinyinya, mu gihe ibipimo bimwe byagombaga gukorwa ku barwayi byajyanywe ku Bitaro bya Kacyiru.
Umuyobozi Mukuru w’Ibitaro bya Kibagabaga yemeje ko ari ubwa mbere inkongi y’umuriro yadutse muri ibi bitaro, yongeraho ko labaratwari yongera gukora uko byari bisanzwe vuba.
