Ingabo z’u Burundi zibarizwa mu mutwe w’ingabo w’umuryango wa Afurika y’iburasirazuba, EACRF, zatangiye kugenzura bimwe mu bice byari byarafashwe n’umutwe witwaje intwaro wa M23 muri teritwari ya Masisi.
Ibi bice ni Sake, Busangara, Kingi, Kabati na Kilolirwe. Zatangiye kubigenzura nyuma y’uruzinduko ubuyobozi bwa EAC burimo komanda Maj. Gen. Jeff Nyagah bwahagiriye kuri uyu wa 14 Werurwe 2023, bugenzura niba abarwanyi ba M23 barabivuyemo.
Ibiro bya EACRF byagize biti: “Itsinda ry’ubugenzuzi rihuriweho riyobowe na komanda wa EACRF Maj. Gen. Jeff Nyagah ryagenzuye uko umutekano uhagaze kuva Sake-Busangara-Kingi-Kabati-Kilolirwe muri teritwari ya Masisi ku wa Kabiri kugira ngo ingabo z’u Burundi ziri muri EACRF zihite zihajya.”
Ibiro by’uyu mutwe w’ingabo za EAC bikomeza bisobanura ko kugenzura niba M23 yararekuye ibice bishingiye ku byemezo byafatiwe mu nama y’abakuru b’ibihugu yabereye i Addis Abeba muri Ethiopia tariki ya 17 Gashyantare 2023.
Byitezwe ko abarwanyi ba M23 bakomeza kurekura ibice bari barafashe, bakajya kuba by’agateganyo hafi y’ikirunga cya Sabyinyo, mu gihe bategereje kujya mu mishyikirano na Leta ya Repubulika ya demukarasi ya Congo.
