Abapolisi bo muri Kenya boherejwe muri Haiti batangiye gutahuka, bikaba ari intangiriro z’icyiciro cyo gucyura aba bapolisi nyuma y’ivugurura rikomeye ry’ubutumwa mpuzamahanga bw’umutekano.
Minisiteri y’ubutegetsi bw’igihugu ya Kenya mu itangazo yashyize ahagaragara kuri uyu wa Gatatu, itariki ya 18 Werurwe 2026, yavuze ko abapolisi 215 bo mu mutwe wa kabiri w’ingabo zoherejwe mu butumwa bw’Ubufasha Mpuzamahanga bw’Umutekano (MSS) bageze i Nairobi.
Minisiteri yanditse kuri X iti: “Abapolisi 215 bagize itsinda rya kabiri ry’Ubufasha Mpuzamahanga bw’Umutekano (MSS) muri Haiti, basubiye mu rugo amahoro. Aba bapolisi bagize itsinda ryoherejwe mu 2023 mu rwego rwo gushyigikira ingamba zo kuzana ituze muri Haiti no gufasha abapolisi b’igihugu cya Haiti mu kugarura umutekano rusange mu turere twibasiwe n’umutekano muke.”
Aba bapolisi bakiriwe na Inspector Gen. Douglas Kanja, ari kumwe n’umunyamabanga mukuru w’umutekano mu gihugu, Raymond Omollo hamwe n’abandi bayobozi bakuru bashinzwe umutekano.
Gucyura abapolisi ba Kenya bije mu gihe biteganyijwe ko bazasimbuzwa Ingabo za Tchad.
Nk’uko Minisitiri w’ububanyi n’amahanga wa Repubulika ya Dominikani, Roberto Alvarez, abitangaza, ngo biteganijwe ko Ingabo za Tchad, ubu ziri guhabwa imyitozo muri Amerika, zizatangira koherezwa muri Mata.
Muri gahunda nshya, abapolisi ba Kenya bazacyurwa mu byiciro mu gihe Ingabo za Tchad zizoherezwa buhoro buhoro.
