Ubushakashatsi bukorwa buri mwaka n’Urwego rw’Igihugu rw’Imiyoborere (RGB) hagamijwe kugaragaza igipimo cy’imiyoborere ibereye abaturage n’imitangire ya serivisi hashingiwe k’uko abaturage babibona, bwagaragaje ko uyu mwaka wa 2017 Intara y’amajyaruguru iza ku mwanya wa mbere mu miyoborere n’imitangire ya serivisi n’amanota 70.9%. Ubwo bushakashatsi bugaragaza ko mu Turere icumi twa mbere, tune ari utwo mu Ntara y’Amajyaruguru, harimo Akarere ka Burera kaza ku mwanya wa mbere ku rwego rw’Igihugu.
Abayobozi batandukanye mu nzego za Leta n’izigenga ndetse n’Abafatanyabikorwa bitabiriye igikorwa cyo kumurika ubushakashatsi ku miyoborere n’imitangire ya serivisi mu nzego zegereye abaturage
Ibi ni ibyaragarajwe mu gikorwa cyo kumurikira Abayobozi batandukanye mu nzego za Leta n’izigenga bo mu Ntara y’Amajyaruguru ubushakashatsi bugaragaza Ishusho y’uko abaturage babona imiyoborere n’imitangire ya serivisi mu nzego zibegereye mu mwaka wa 2017. Iki gikorwa cyabereye mu Cyumba cy’inama cya Hoteli Urumuri iherereye mu Karere ka Gicumbi kuri uyu wa gatatu tariki ya 29 Ugushyingo 2017.
Iki gikorwa cyateguwe n’Urwego rw’Igihugu rw’Imiyoborere ku bufatanye n’Intara y’Amajyaruguru, kitabiriwe n’Umuyobozi Mukuru wa RGB, Prof Shyaka Anastase, Guverineri w’Intara y’Amajyaruguru, Hon Gatabazi Jean Marie Vianney, Uhagarariye UNDP mu Rwanda, Stephen Rodrigues, Abayobozi b’Ingabo na Polisi ku rwego rw’Intara, Abayobozi b’Uturere tugize Intara y’Amajyaruguru n’abandi Bayobozi batandukanye ndetse n’Abafatanyabikorwa batandukanye b’iyi Ntara.
[xyz-ihs snippet=”google-pub”]
Mu ijambo rye, Umuyobozi Mukuru wa RGB, Prof Shyaka Anastase yavuze ko ubushakashatsi bwamuritswe, bwakorewe mu ngo zigeze ku bihumbi cumi na kimwe (11,000) mu Turere tw’Igihugu twose uko ari 30, bukorwa ku bipimo 15 bikubiye mu nkingi enye za Guverinoma, ari zo Imiyoborere n’ubutabera, Ubukungu n’Imibereho myiza.
Mu bikubiye muri ubwo bushakashatsi, Umuyobozi Mukuru wa RGB yavuze ko icyiciro cy’umutekano ari cyo cyahize ibindi, kuko abaturage bagaragaje ko bishimira Inzego z’Umutekano ku rugero ruri hejuru ya 90%, icyiciro kirebana no kubahiriza amahame y’imiyoborere n’uburenganzira bwa muntu cyaje ku mwanya wa kabiri mu gihe icyiciro cyazamuye urwego cyariho mu myaka yashize bikagihesha amanota mu baturage ari icy’ubutabera. Yagaragaje kandi ko hari ibyiciro birimo icy’ubuhinzi n’ubworozi abaturage bagaragaje ko bikiri ku rwego rwo hasi, bityo bikaba bikeneye gushyirwamo imbaraga nyinshi.
Umuyobozi Mukuru wa RGB yashimye intambwe imaze guterwa, aho yavuze ko ubushakashatsi bugaragaza ko Abanyarwanda bameze neza mu mutekano, ubwisanzure no kwishyira ukizana n’imibereho myiza igenda izamuka. Yongeyeho ariko ko Abanyarwanda bafite inyota yo kugera ku iterambere ryisumbuyeho. Yasabye Abayobozi ku nzego zitandukanye ndetse n’abaturage gufatanya no kongera imbaraga aho zikenewe, kugira ngo iryo terambere ryifuzwa rizagerweho.
Guverineri w’Intara y’Amajyaruguru, Hon Gatabazi yatangaje ko nyuma yo kumurikirwa ibyagaragajwe n’abaturage b’Intara y’Amajyaruguru, yishimiye intambwe Intara ayoboye yateye, kuko yaje ku mwanya wa mbere mu miyoborere n’imitangire ya serivisi kandi ikaba ifite abaturage bazi gukora no kwitanga ndetse bishimira Ubuyobozi bw’Igihugu, nk’uko byagaragajwe n’ibipimo bikubiye mu bushakashatsi bwakozwe n’Urwego rw’Igihugu rw’Imiyoborere.
Abitabiriye iki gikorwa bahawe kandi umwanya wo gutanga ibitekerezo ku bikubiye muri ubu bushakashatsi mu rwego rwo kurushaho gukosora no kunoza ibyagaragajwe bitagenze neza nk’uko iyi nkuru y’urubuga rw’intara isoza ivuga.
Kanda hano ujye ubona amakuru yihuse kandi kugihe kuri Facebook no kuri twitter
@bwiza.com
