Intumwa z’akanama k’Umuryango w’Abibumbye (UN) gashinzwe umutekano ziraba ziri muri Repubulika ya demukarasi ya Congo guhera kuri uyu wa 9 kugeza ku wa 12 Werurwe 2023.
Misiyo y’amahoro ya UN muri RDC, MONUSCO, yatangaje ko impamvu nyamukuru y’uru ruzinduko ari ukugenzura uko umutekano uhagaze muri iki gihugu no gushyira mu bikorwa manda nshya y’iyi misiyo yemejwe tariki ya 20 Ukuboza 2022.
Zirateganya guhura n’abayobozi batandukanye muri RDC barimo Perezida Félix Tshisekedi, Minisitiri w’Intebe, abagize guverinoma, Perezida wa Sena, Perezida w’Abadepite, abanyapolitiki, abahagarariye sosiyete sivile, abadipolomate, MONUSCO n’abahagarariye UN.
Uruzinduko rw’izi ntumwa ruzarangirira mu mujyi wa Goma, baganire n’abayobozi bo mu ntara ya Kivu y’Amajyaruguru, abahagarariye sosiyete sivile, abimuwe mu byabo n’umutekano muke ndetse n’abahagarariye inzego z’akarere RDC iherereyemo.
Tariki ya 12 Werurwe, izi ntumwa zizagirana ikiganiro n’abanyamakuru, kizabera i Goma.
