Abarwanyi batanu b’umutwe witwaje intwaro wa FLN urwanya ubutegetsi bw’u Rwanda baherutse kwicirwa mu ishyamba rya Kibira mu Burundi, ahagana mu ntara ya Cibitoke iri ku mupaka.
Urubuga SOS Burundi rusobanura ko bapfiriye mu mirwano FLN yari ihanganiyemo n’ingabo z’u Burundi zifite ibirindiro muri Kibira, yabereye ku musozi wa Gasenyi na Gafumbegeti muri komini Mabayi.
Ngo abarwanyi ba FLN baguwe gitumo ubwo bacukuraga amabuye y’agaciro muri iri shyamba, baraswaho, hicwamo bariya, abandi bane barakomereka. Na bo bahise basubiza, bararasa.
Abapfuye bahise bashyingurwa muri iri shyamba, abakomeretse bajyanwa kuvurizwa mu bitaro biherereye mu ntara ya Bujumbura.
U Burundi na bwo ngo bwatakaje umusirikare umwe, abandi babiri bakomereka bikabije.
