Inzobere mu bumenyi bw’ubwirinzi bw’umubiri (immunology) mu biro by’Umukuru w’Igihugu wa Leta Zunze Ubumwe z’Amerika, Dr. Anthony Fauci kuri uyu wa 29 Mata 2020 yatangaje ko habonetse umuti wa Covid-19 ubanza kwemezwa n’inzego zibishinzwe.
Dr. Fauci yavuze ko uyu muti ari Remdesivir, wihutisha igihe cyo gukira Covid-19 ku muntu wawunyoye nk’uko igitangazamakuru cy’Abongereza, Metro cyabitangaje.
Uyu muhanga yakomeje avuga ko ubusanzwe, bisaba gutegereza iminsi itari munsi ya 15 kugira ngo uwarwaye iki cyorezo abe amaze gutakaza ibimenyetso ariko ngo uyu muti uzajya utuma bitwara iminsi 11 gusa.
Uyu muti urusha ubukana uwitwa Placebo, cyane ko wo mu bawuhawe, 92% ari bo bakize mu gihe 89 % bahawe Placebo ari bo bakize gusa. Byumvikane ko abapfuye banyoye Remdesivir ari 8%, mu gihe aba Placebo ari 11%.
Metro kuri uyu wa 29 Mata yatangaje ko Ikigo cy’Igihugu gishinzwe kugenzura imiti n’ibiribwa ari cyo gitegerejwe ngo cyemeze uyu muti ko watangira kwifashishwa mu buvuzi bwihutirwa.
Dr. Fauci yizerwa cyane mu gushaka inkingo n’imiti bivura cyangwa bikagabanya ubukana bw’indwara. Ari mu itsinda ry’abavumbuye ko uruvangitirane rw’imiti rushobora kugabanya ubukana bw’agakoko gatera SIDA, bityo rero ngo Remdesivir ivanzwe n’indi miti bishobora gutanga umusaruro mwiza kurushaho.
