Umuntu witwaje imbunda yarashe ku biro by’abashinzwe umutekano kuri Ambasade ya Azerbaijan i Tehran muri Iran nk’uko byatangajwe na Minisiteri y’ububanyi n’amahanga i Baku (umurwa mukuru wa Azerbaijan). Umuyobozi w’abashinzwe umutekano kuri ambasade yishwe mu gihe abashinzwe umutekano babiri bakomerekeye muri icyo gitero cyagabwe mu gitondo cyo kuri uyu wa Gatanu .
Minisiteri yavuze ko ubuzima bw’abacitse ku icumu “bumeze neza” kandi yiyemeza kuza gutanga amakuru arambuye mu gihe iperereza rigikomeje.
Amashusho bivugwa ko yerekana ibyabaye, yakwirakwijwe ku mbuga nkoranyambaga, arimo ifoto igaragaza umurambo utwikirijwe ishuka uryamye hasi. Uwo murambo kandi wafotowe utaratwikirwa.
Amashusho menshi yafatiwe imbere ya ambasade yerekana imodoka za polisi n’umugabo bigaragara ko ari kuvurwa nyuma yo gukomereka ukuboko nk’uko iyi nkuru dukesha Russia Today ivuga.
Umuyobozi w’igipolisi cya Tehran, Sardar Hossein Rahimi, yatangarije ibitangazamakuru byo muri Iran ko uwo muntu witwaje imbunda yatawe muri yombi akimara kurasa. Yavuze ko uwarashe yari yaje muri ambasade hamwe n’abana be babiri bato kandi ko abapolisi bemeza ko iki gitero cyatewe n’akababaro kabo bwite.
Minisiteri y’ububanyi n’amahanga y’u Burusiya nyuma y’aya makuru yihanganishije abakozweho n’iki gitero. Ku mbuga nkoranyambaga, umuvugizi wa yo, Maria Zakharova yagize ati: “Turihanganisha kandi dushyigikiye bagenzi bacu bo muri Azerbaijan.”
