Leta Zunze Ubumwe za Amerika ziratangaza ko zitazigera zemera ko igihugu cya Irani gikora ibitwaro kirimbuzi nyuma y’aho gitangarije ko cyarengeje igipimo cy’ubumara bwa Uranium nk’uko biteganywa n’amasezerano mpuzamahanga yo mu 2015 abuza iki gihugu gukora ibitwaro kirimbuzi.
Ibiro bya perezida Donald Trump kuri uyu wa Mbere byatangaje ko Irani ikwiye kubahiriza ayo masezerano kandi Leta Zunze Ubumwe za Amerika zizakomeza kotsa igitutu Irani kugeza igihe abategetsi bayo bazahindurira imyifatire.
Minisitiri w’ububanyi n’amahanga wa Irani, Javad Zarif, yabwiye Ibiro Ntaramakuru ISNA, byegereye leta, ko Irani yarengeje igipimo cy’ibiro 300, bisobanuye ko iki gihugu gitunze Uranium ifite ubumara bugera kuri 3,67% nk’uko iyi nkuru dukesha Ijwi rya Amerika ivuga.
Ngo ni ku nshuro ya mbere Irani irenze ku masezerano yagiranye n’ibihugu 6 bikomeye kw’isi, birimo Leta Zunze Ubumwe za AmeriKa n’Umuryango w’Ubumwe bw’u Burayi.
