Indi minsi itanu y’inyongera, uhereye uyu munsi, ni yo urukiko rwatanze mbere yo gutanga umwanzuro ku rubanza rw’uwahoze ari umuyobozi w’ibiro by’umukuru w’igihugu muri Repubulika ya Demokarasi ya Congo, Vital Kamerhe, nk’uko byatangajwe kuri uyu wa Kane, itariki 16 Kamena.
Urubanza rwa Kamerhe rwasubiwemo kuwa 2 Kamena, ababuranyi batanze impamvu zabo z’ubujurire kandi bitabira iburanisha buri ruhande rwiregura mu buryo bwarwo.
Ubushinjacyaha bwo bwasabye kwemeza icyemezo cy’umucamanza wa mbere, mu gihe abaregwa basabye ko urubanza rwa mbere rwateshwa agaciro burundu nk’uko iyi nkuru dukesha mediacongo.net ivuga.
Ku itariki ya 20 Kamena 2021 Urukiko Rwisumbuye rwa Gombe muri Kinshasa rwari rwakatiye Vital Kamerhe na Samih Jammal imyaka 20 y’igifungo, naho Jeannot Muhima bareganwa akatirwa imyaka 2.
Ibi bihano byaragabanyijwe nyuma Kamerhe akatirwa imyaka 13 y’igifungo, Jammal akatirwa 6 naho Muhima umwaka umwe. Uyu wa nyuma we yamaze no gufungurwa nyuma yo kurangiza igihano cye mu gihe abandi barekuwe by’agateganyo.
