Général de Brigade Pierre Banywesize uri mu nkoramutima za Joseph Kabila Kabange wahoze ari Perezida wa Repubulika Iharanira Demokarasi ya Congo, yatawe muri yombi.
Banywesize yahoze ari umurinzi wihariye wa Joseph Kabila.
Amakuru avuga ko ku wa Kane tariki ya 22 Gicurasi ari bwo yatawe muri yombi n’ubutasi bwa RDC, nyuma y’amasaha make ahatwa ibibazo.
Uyu Jenerali wari umaze igihe akorera i Dungu mu ntara ya Haut-Uele, amakuru aturuka muri RDC avuga ko yafatiwe i Kinshasa aho yari ategerereje kujya hanze y’igihugu kwivuza.
Kugeza ubu ntiharamenyekana ibyaha akurikiranweho.
Uyu musirikare icyakora yatawe muri yombi, mu gihe ubutegetsi bw’i Kinshasa bukomeje kugera intorezo uwahoze ari sebuja.
Ku wa Kane Sena ya RDC yambuye Kabila ubudahangarwa inaha Urukiko Rukuru rwa Gisirikare ububasha bwo kumukurikirana, nyuma yo kuregwa ibyaha birimo kujya mu mutwe ugambiriye gukuraho ubutegetsi bwa Perezida Tshisekedi, ubugambanyi ndetse no kujya mu mutwe ukora ibyaha by’intambara n’ibyibasiye inyoko muntu.
Ni Kabila Leta ya Kinshasa imaze igihe ishinja kuba akorana akanatera inkunga umutwe wa M23 uri mu ntambara na yo.
