Kanisa Katoliki katika Dayosisi ya Warri, Jimbo la Delta nchini Nigeria, limemsimamisha Rev. Fr. Daniel Okanatotor Oghenerukevwe kutoka kwenye majukumu yake ya kipadri baada ya ripoti kuibuka kwamba alifanya harusi kwa siri nchini Marekani.
Katika taarifa iliyosainiwa na Askofu wa Warri, Mheshimiwa Anthony Ovayero Ewherido, pamoja na Katibu wa Dayosisi, Padri Clement Abobo, tarehe 16 Januari 2025, Dayosisi ilitangaza kuwa Padri Oghenerukevwe alimuoa Dora Chichah mnamo Desemba 29, 2024, katika kanisa la Streams of Joy lililoko Dallas.
Video za harusi hiyo zilizosambazwa mitandaoni na ndugu wa bi harusi ndizo zilizosababisha Dayosisi ichukue hatua.
Taarifa hiyo ilisomeka: “Kutokana na kitendo alichofanya, Padri Daniel Okanatotor Oghenerukevwe amesimamishwa kutoka kwenye majukumu ya kipadri kama inavyotakiwa na Kanuni ya 1394 §1. Mimi, Askofu Anthony Ovayero Ewherido, natangaza rasmi kusimamishwa kwake kutoka shughuli zote za kipadri.”
Dayosisi pia ilieleza kuwa Padri Oghenerukevwe aliomba kuachia wadhifa wake wa upadri tarehe 30 Novemba 2024, lakini hakuwasilisha nyaraka muhimu kabla ya kufunga ndoa.
“Kwa sababu hiyo, anapoteza haki zote na hadhi kama padri wa Dayosisi ya Warri. Madhara yote ya kisheria yanachukua nafasi mara moja,” taarifa iliongeza.
Dayosisi ilimalizia kwa kusema kwamba Padri Oghenerukevwe ana haki ya kuomba uamuzi huo ubadilishwe au kufutwa, endapo ataonyesha nia ya kweli ya kutubu.
