Nibura abantu 10 bari bamaze kumenyekana ko bapfiriye mu myigaragambyo yo kwamagana guverinoma muri Kenya kugeza ku mugoroba wo kuri uyu wa Mbere ushize, nk’uko byatangajwe na Komisiyo y’Igihugu ishinzwe Uburenganzira bwa Muntu muri Kenya (KNCHR).
Nk’uko byatangajwe na Felix Maringa, umunyamakuru wa DW i Nairobi, ngo abapolisi mu gitondo cya kare bari bafunze imihanda igana mu murwa mukuru, Nairobi, kugira ngo babuze abigaragambyaga guhurira mu mujyi rwagati.
Itangazo rya polisi ryashyizwe ahagaragara rivuga ko abantu barenga 560 batawe muri yombi mu gihugu hose mu myigaragambyo yo kuri uyu wa Mbere ushize, itariki 7 Nyakanga 2025.
Iri tangazo ryashyizwe ahagaragara nyuma ya raporo ya KNCHR, ryagereranije ko abantu 11 bishwe, kandi ko abapolisi benshi bakomeretse.
Kuri uyu wa Mbere, abigaragambyaga bibukaga imyigaragambyo yo ku itariki ya 7 Nyakanga, izwi ku izina rya “Saba Saba,” imyigaragambyo ya mbere ikomeye muri Kenya yabaye mu myaka 35 ishize.
