Perezida wa Repubulika ya Kenya, Uhuru Kenyatta yategetse ko imipaka yose ihuza iki gihugu na Tanzania na Somalia ifungwa mu rwego rwo kwirinda gukwirakwiza icyorezo cya Covid-19 ku baturage ba Kenya mu gihe Tanzania yo itungwa agatoki kuba yarahaye urwaho iki cyorezo kikaba gikomeje gufata indi ntera mu baturage bayo.
Ibi Umukuru w’igihugu cya Kenya yabitangaje kuri uyu wa Gatandatu aho yavuze ko imizigo yonyine ari yo yemerewe kwinjira ku butaka bw’iki gihugu. Gufunga imipaka byatewe n’uko ngo imibare y’abanduye iyi ndwara muri iki gihugu yiganjemo ubwiyongere bw’abaturutse mu mahanga cyane cyane abaturutse muri Tanzania na Somalia bisangiye imipaka na Kenya.
Perezida Uhuru yagize ati “Mu cyumweru gishize twabonye ubwiyongere bw’ubwandu bushya bwaturutse hanze y’igihugu harimo ubwambutse mu bihugu duhana imbibi. Aha hantu haduteye impungenge.”
Yakomeje ati “Mirongo ine na batatu (43) mu bo twabonye ni abari baragiriye ingendo mu bihugu bya Tanzania na Somalia. Hagiye kubaho guhagarika abagenzi kwerekeza mu bice bya Tanzania na Somalia guhera muri iri joro.”
Perezida Uhuru kandi yavuze ko gahunda ya Guma mu Rugo yongerewe kugeza tariki 06 Kamena 2020 ndetse n’ingendo zituruka mu bindi bice by’iki gihugu zerekeza mu muri Nairobi, Mombasa, Kilifi, Kwale na Mandela zikaba zikomeje guhagarikwa kugeza tariki 05 Kamena 2020.
Inzego zitandukanye zirimo na OMS zimaze iminsi zitunga agatoki Leta ya Tanzania iyobowe na Perezida Magufuli kugenda biguru ntege mu kurwanya icyorezo cya Coronavirus ku buryo yahawe urwaho muri iki gihugu, kuri ubu kikaba gitangaza ko abantu 509 bamaze kwandura naho 21 bishwe nayo. Ni mugihe Somalia yo abamaze kwandura Covid-19 ari 1200 naho 53 bakaba barahitanywe nayo. Muri Kenya abamaze kwandura iyi ndwara ni 830 muribo 53 yarabishe.
