Ubushinjacyaha urwego rw’ibanze rwa Kicukiro ku wa 12 Ugushyingo 2022 bwakiriye dosiye y’umugabo witwa Mugabutsinze Olivier wishe umugore we Uwarwego Francine babanaga batarashyingiranwe byemewe n’amategeko, akaba yaramwishe amuteye icyuma mu gatuza .
Ibi ngo byabereye mu Mudugudu wa Mahoro, Akagali ka Karambo, Umurenge wa Gatenga nk’uko tubikesha Ubushinjacyaha Bukuru.
Uregwa yemera icyaha akanagisabira imbabazi; akavuga ko yabitewe n’uko yakekaga ko uyu mugore amuca inyuma.
Naramuka ahamwe n’icyaha cy’ubwicanyi akurikiranweho, uregwa azahanishwa igihano cy’igifungo cya burundu hashingiwe ku ngingo ya 107 y’itegeko No 68/2018 ryo ku wa 30/08/2018 riteganya ibyaha n’ibihano muri rusange.
