Kuri uyu wa gatanu tariki ya 2 Ukuboza, kuri Sitade nto iri i Remera mu karere ka Gasabo, hateraniye ihuriro rya 2 ry’urubyiruko rw’abakorerabushake mu kwicungira umutekano, baganira uko bakomeza kwesa imihigo mu gukumira ibyaha no kwicungira umutekano, runasabwa kongera imbaraga ngo igihugu kigere ku iterambere rirambye.
Iri huriro rikaba ryahuje urubyiruko rugera ku 1500 ruhagarariye urundi rurenga ibihumbi 60, ab’itabiriye iri huriro bakaba ari komite ku rwego rw’igihugu, iyo ku rwego rw’uturere n’imirenge yose y’igihugu.
Mu bifatanyije n’uru rubyiruko bakanaruha ibiganiro, harimo Minisitiri w’ubutegetsi bw’igihugu Francis Kaboneka, Minisitiri w’urubyiruko n’ikoranabuhanga Jean Philbert Nsengimana, n’umuyobozi w’ikigo cy’igihugu cy’imiyoborere (RGB) Prof. Shyaka Anastase, umuyobozi mukuru wa Polisi y’u Rwanda IGP Emmanuel K. Gasana, abayobozi bakuru batandukanye muri Polisi y’u Rwanda n’abapolisi bashinzwe guhuza ibikorwa bya Polisi n’iby’abaturage (DCLOs) mu turere twose tw’u Rwanda.
[ad id=”44145″]
Mu kiganiro bahawe na Minisitiri Kaboneka, yabasabye kwegera bagenzi babo bakagera ku rwego bagezeho, kandi ko ibikorwa byabo ubuyobozi bukuru bw’igihugu bubishima.
Yavuze ati:Nk’urubyiruko, iki nicyo gihe cyanyu cyo gukorera igihugu, cyo guhitamo icyerekezo mwerekezamo igihugu cyacu. Mu myaka yashize, bamwe mu bayobozi b’igihugu bakoresheje imbaraga n’ubwitange ngo igihugu kigere aho kigeze, kurusha izo musabwa gukoresha uyu munsi, urukundo bari bafitiye igihugu rwatumye bakora ibyo benshi babonaga ko bidashoboka, urwo rukundo rwaranzwe no kureba kure, kutazarira, gushyira hamwe, no kugira icyerekezo. Ibyo bakoze bageze ku bikorwa usibye n’u Rwanda n’isi yose izahora yibuka. Murasabwa kugera ikirenge mu cyabo, mugaharanira kuba intwari kandi ubutwari buraharanirwa.”
Yakomeje ababwira kutumva ababaca intege, kuko bari mu nzira nziza, baharanira kurwanya ruswa no kubabazwa n’uwangiza cyangwa udashyira mu bikorwa gahunda za Leta, cyane cyane izigenerwa abatishoboye, n’izigenewe gufasha no kwihutisha iterambere.
Minisitiri w’urubyiruko n’ikoranabuhanga Jean Philbert Nsengimana, yababwiye ko kuba urubyiruko rwarafashe iya mbere mu gukumira ibyaha no kwicungira umutekano ari iby’igiciro kuko urubyiruko arirwo mbaraga z’igihugu.
Yavuze ati:”Ubuto ni ubukungu, kandi urubyiruko ruba rufite amahirwe menshi atandukanye, mugomba rero kuyabyaza umusaruro, murushaho kurangwa n’ubunyangamugayo.
Yababwiye kandi ko gukumira no kurwanya ibyaha bisaba ubufatanye mu nzego zose, anabakangurira kugira ubumenyi mu ikoranabuhanga.
Kuri iyi ngingo yavuze ati:”Ibyaha bivuka muri iki gihe
bishingiye ku ikoranabuhanga, kandi birihuta, birabasaba ko mugira ubumenyi n’ubushobozi burushije ubw’abakora ibyaha nk’ibyo ngo tubirwanye n’ababikora batahurwe.”
Umuyobozi wa Polisi y’u Rwanda IGP Emmanuel K. Gasana yashimiye uru rubyiruko kuba rwariyemeje gukumira no kurwanya ibyaha bitaraba, kugirango u Rwanda rugire umutekano hanyuma iterambere
ryihute.
[xyz-ihs snippet=”google-pub”]
Yakomeje ababwira ati:”Umutekano ni inkingi ikomeye mu iterambere ry’igihugu, kandi kugeza ubu umeze neza, ukaba udakwiye guhungabana ahubwo ukarushaho kumera neza.”
Yabijeje ko Polisi y’u Rwanda n’izindi nzego za guverinoma y’u Rwanda, bazabahugura mu ikoranabuhanga kugirango barusheho gukumira no kurwanya ibyaha.
IGP Gasana yasoje abwira uru rubyiruko ko bagomba kugira uruhare ngo hatagira uvogera igihugu kandi ko
nk’urubyiruko batagomba kugira urujijo y’ahazaza heza habo.
Yavuze ati:”Igihugu cyacu ntikivogerwa kandi urubyiruko rufite urujijo ntirureba kure, ahubwo usanga rwishora mu biyobyabwenge, ntirugire icyo rwimarira ubwarwo, n’igihugu muri rusange.”
Umuhuzabikorwa w’uru rubyiruko Kangwagye Justus, yashimiye
Polisi y’u Rwanda na Guverinoma y’u Rwanda muri rusange kubera uruhare izi nzego zidahwema gutera urubyiruko rw’abakorerabushake mu kwicungira umutekano, anizeza ko
bagiye gukora ibishoboka byose bakongera umubare w’abanyamuryango.
Urubyiruko rw’abakorerabushake mu kwicungira umutekano rwatangiye ibikorwa byarwo mu mwaka wa 2013, ubu rukaba rufite abanyamuryango barenga ibihumbi 60, rukaba rufite gahunda ko mbere ya 2020 ruzaba rugeze ku bihumbi 100 by’abanyamuryango.
Imwe mu myanzuro yafatiwe muri iri huriro, urubyiruko rwiyemeje; gushyira imbaraga mu gukoresha ikoranabuhanga hagamijwe gukumira ibyaha ndengamipaka, gukora ibishoboka byose bagakumira ikoreshwa n’icuruzwa ry’ibiyobyabwenge, ruswa n’akarengane mu midugudu batuyemo, gukomeza kurangwa n’umuco wo gukunda igihugu, kurangwa n’indangagaciro ziranga umunyarwanda muzima no kuba bandebereho.
Kanda hano ujye ubona amakuru yihuse kandi kugihe kuri Facebook no kuri twitter
@Bwiza.com
