Mu ruzinduko rwe muri Repubulika ya Demokarasi ya Congo (DRC), uwahoze ari Perezida w’u Bufaransa, François Hollande, kuri uyu wa Kabiri i Kinshasa yasabye “ihagarikwa ryo kwivanga mu bibazo bya Congo” no gushyiraho ingabo z’Umuryango w’Abibumbye “zifite ingufu” zo kuzana amahoro mu burasirazuba bwayogojwe n’intambara.
Hollande yatangarije AFP ati: “Congo ni igihugu gifite ubusugire, cyigenga, kigendera kuri demokarasi, kigomba kwikemurira ibibazo byacyo, harimo n’izo nyeshyamba ziza guhungabanya ubuzima bw’abaturage”.
Uwahoze ari perezida wari uherekejwe n’umugore we, Julie Gayet, yari amaze gusura inzu ndangamurage ya Repubulika ya Demokarasi ya Congo, mbere yo kujya i Bukavu, umurwa mukuru w’Intara ya Kivu y’amajyepfo kwitabira umuhango wo gutangiza serivisi nshya mu bitaro bya muganga w’indwara z’abagore, Dr Denis Mukwege, wahawe igihembo cy’amahoro cyitiriwe Nobel mu 2018 kubera ibikorwa bye byo gufasha abagore bahohotewe.
Hollande yagize ati: “Ngiye mu burasirazuba (…) kubera ko ari agace kagifite ibibazo, hamwe n’abasivili benshi bahohotewe kandi bikenewe, Perezida (Emmanuel) Macron na we yafashe iya mbere mu guteza imbere amahoro muri kariya gace k’igihugu, kurangiza kwivanga kw’amahanga n’ubunyamanswa buhakorerwa , n’ihohoterwa abagore bahura naryo ”.
Ubwo bari bitabiriye inama y’Inteko Rusange y’Umuryango w’Abibumbye i New York mu cyumweru gishize, Perezida Macron yahuje Perezida Félix Antoine Tshisekedi Tshilombo na Perezida w’u Rwanda, Paul Kagame, kugira ngo bagerageze kugabanya umwuka mubi hagati y’abaturanyi bombi, wongeye kubyutswa no kugaruka k’umutwe wa M23 Kinshasa ishinja Kigali gushyigikira.
Francois Hollande ubwo yari ageze i Bukavu
Abajijwe ku butumwa afite yatanga nk’uko iyi nkuru dukesha La Libre Afrique ikomeza ivuga, Hollande yagize ati: “ubutumwa ngomba gutanga ni iherezo ryo kwivanga mu buryo bwose”.
Ku bijyanye n’ingabo z’Umuryango w’Abibumbye muri RDC (Monusco), kugenda kwazo kwasabwe cyane n’abigaragambyaga bavuga ko zitashoboye kuzana amahoro nyuma y’imyaka irenga makumyabiri ziri muri iki gihugu, François Hollande yavuze ko izo ngabo “ari ngombwa mu gukumira, no kurinda “.
Yakomeje avuga ko kugerageza guhambiriza izi ngabo “kwaba ari ukwemera gukina umukino w’imitwe ikangaranya abaturage cyangwa kwemera ibikorwa bya kinyamanswa bitakwihanganirwa,”
Icyakora, avuga ko muri DRC kimwe no mu bindi bihugu bimwe na bimwe, “imiterere y’imikorere, imiterere y’izo ngabo, ibikoresho byazo, bitajyanye na manda zahawe”.
Izo ngabo, nk’uko abibona, zigomba “kurushaho gukora neza, ndetse zikabasha no guhangana n’iyo mitwe”.
