Repubulika ya Demokarasi ya Congo (DRC) na Repubulika ya Congo byiyemeje gushimangira ubufatanye mu by’umutekano binyuze mu biganiro byabaye hagati y’abaminisitiri b’ingabo z’ibihugu byombi, hagamijwe gushimangira ubufatanye mu bya gisirikare no gukemura ibibazo rusange by’umutekano.
Ibi ni bimwe mu bintu nyamukuru byavuye mu ruzinduko rwa Minisitiri w’Ingabo wa Repubulika ya Congo, Charles Richard Mondjo, nyuma y’ibiganiro yagiranye na mugenzi we wa DRC, Guy Kabombo Muadiamvita, biri mu rwego rwo kurushaho kwegerana hagati y’ibi bihugu byombi bituranye.
Nyuma y’akarasisi ka gisirikare kateguwe mu rwego rwo kumuha icyubahiro ku wa Gatandatu, itariki ya 4 Mata, abo bayobozi bombi bahuye imbonankubone bonyine kugira ngo baganire ku bufatanye mu bya gisirikare hagati y’ibihugu byombi.
Hakurikiyeho inama yagutse irimo n’inzobere mu bya gisirikare za Repubulika ya Congo na Repubulika ya Demokarasi ya Congo.
