Jean-Claude Muyambo utavuga rumwe n’ubutegetsi muri Repubulika ya Demokarasi ya Congo, yajyanye umushinjacyaha mukuru mu rukiko rw’ubujurire rwa Kinshasa, Robert Kumbu Phanzu, nyuma y’icyemezo cyo guhagarika gushakisha uwahoze ari umuyobozi w’urwego rw’igihugu rw’ubutasi (ANR), Kalev Mutond.
Uyu munyapolitiki, Jean-Claude Muyambo yari yatanze ikirego, ku itariki ya 15 Mutarama 2021, ku biro by’ubushinjacyaha bukuru bwa Kinshasa muri Gombe, arega uwahoze ari umuyobozi w’ikigo cy’igihugu gishinzwe iperereza (ANR), Kalev Mutond.
Perezida w’ishyaka rya politiki, Solidarité congolaise pour la démocratie et le développement (SCODE) yashinje Kalev Mutond ibintu byinshi birimo gutabwa muri yombi binyuranyije n’amategeko, iyicarubozo ku mubiri no mu mutwe no kugerageza kumwica nk’uko iyi nkuru dukesha Mediacongo ikomeza ivuga.
Ku wa Kane ushize, itariki ya 10 Kanama, Urukiko rw’Ubujurire rwa Kinshasa rwatangaje ko rwakuyeho icyemezo cyo gushakisha Kalev Mutond. Nk’uko byatangajwe n’umushinjacyaha Robert Kumbu wasinye icyemezo gihagarika gushakisha, ngo “impamvu ntizikiriho”.
