Urubanza ku iyicwa rya Ambasaderi w’u Butaliyani wiciwe mu 2021 muri Repubulika ya Demokarasi ya Congo rwigijwe inyuma icyumweru kuri uyu wa Gatatu I Kinshasa kubera ko ibura ry’abunganizi bunganira abashinjwa kugira uruhare muri ubu bwicanyi.
Iburanisha ryatangijwe rikerewe amasaha abiri. Perezida w’urukiko yahamagaye abaregwa batanu maze ababaza impamvu abunganizi babo badahari nk’uko iyi nkuru dukesha Actualite.cd ivuga.
Baramusubiza bati: “Simbizi.”
Aba bagabo batanu bitabye muri uru rubanza, rwatangiye kuva ku ya 12 Ukwakira imbere y’urukiko rwa gisirikare rwa Kinshasa-Gombe, rwari rwimuriye imirimo muri gereza ya gisirikare ya Ndolo, aho bafungiye. Uregwa wa gatandatu, ntarafatwa, aburanishwa adahari.
Bose baraburanishwa kubera iyicwa ry’uwari Ambasaderi w’u Butaliyani muri Repubulika ya Demokarasi ya Congo, Luca Attanasio, umurinzi we w’Umutaliyani, Vitoria Iacovacci, n’umushoferi w’Umunyekongo wakoreraga Ishami ry’Umuryango w’Abibumbye ryita ku Biribwa (WFP), Mustafa Milambo.
Aba bagabo batatu bararashwe nyuma yo kugwa mu gico hafi ya Parike ya Virunga, mu ntara ya Kivu y’Amajyaruguru (iburasirazuba).
Ku ya 15 Gashyantare, urukiko rwa gisirikare rwemeje ko impaka ku mbogamizi z’urubanza zarangiye. Inyandiko y’ibirego hamwe n’ubujurire bikaba byari bitegerejwe ku ya 1 Werurwe.
Perezida w’urukiko rwa gisirikare rero yabajije ati: “Ese muhemba abunganizi banyu?”
Abaregwa basubije bati “oya”, basobanura ko ari “abakene”, “batishoboye”, mbere yo kuvuga ko badashobora kwiburanira bonyine, badafite ababunganira.
Iki gitekerezo bakemeranyije n’umushinjacyaha, wasabye ko urubanza rwasubikwa “ngo abaregwa babone kuvugana n’abavoka babo kugira ngo iyo mbogamizi iveho burundu”.
Iburanisha ritaha riteganijwe ku ya 8 Werurwe.
Nk’uko amakuru aturuka mu begereye iyi dosiye batifuje ko amazina yabo atangazwa avuga, ngo aba bunganizi bashyirwaho n’inzego z’ubutabera za Congo, ntibarahembwa, nyuma yo kugera mu rukiko inshuro 16. Ngo kutagaragara mu rukiko rero byaba biri mu rwego rwo “gushyira igitutu”, ku babishinzwe.
