Komiseri muri Polisi ya Repubulika ya Demokarsi ya Congo, Nzenze Bavon, wari wungirije umukuru w’igipolisi mu Mujyi wa Butembo, yahitanwe n’ibikomere kuri uyu wa Gatatu, itariki 24 Kanama 2022, apfiriye i Goma, mu Ntara ya Kivu y’Amajyaruguru.
Biravugwa ko yapfuye nyuma y’aho kuwa 12 Kanama 2022 we n’abo bari kumwe bari baguye mu gico cy’inyeshyamba za Mai-Mai ubwo bari mu kazi.
Aya makuru yemejwe na Nasson Murara, umuhuzabikorwa w’agateganyo w’ishami rya polisi rishinzwe amakuru mu bikorwa byo kubungabunga amahoro muri majyaruguru y’intara avugana na Actu7.cd.
Muri icyo gitero yarasiwemo, abandi bapolisi bane bahise bapfiraho, abandi babiri barakomereka ndetse imodoka yabo iratwikwa.
Mbere yo kugirwa komanda wungirije wa polisi mu Mujyi wa Butembo, Nzenze Bavon yari komanda wa polisi ishinzwe kurinda umupaka wa Kasindi.
