Minisitiri w’urubyiruko, Dr Abdallah Utumatwishima arasaba urubyiruko koroherana no kwemera gukosorwa mu gihe hakomeje igikorwa cyo kwibuka ku nshuro ya 29 jenoside yakorewe Abatutsi mu 1994.
Mu rwego rwo kwirinda gukomeretsanya no gukora ibyaha, Abanyarwanda n’Abaturarwanda basabwa kumenya imvugo ziboneye baba bagomba gukoresha, by’umwihariko mu gihe cyo kwibuka jenoside yakorewe Abatutsi mu 1994. Izo zigaragara ku rutonde ruri munsi rutangazwa na Minisiteri y’ubumwe n’inshingano mboneragihugu.
Ni yo mpamvu ushobora kubona ku mbuga nkoranyambaga havutse impaka bitewe n’imvugo umuntu yaba yakoresheje zijyanye na jenoside yakorewe Abatutsi mu 1994, agasabwa gukoresha iboneye, cyangwa se inzego z’ubutabera zigasabwa kumukurikirana.
Kuri uyu wa 7 Mata 2023, mu gihe icyumweru cy’icyunamo cyatangiye, umwe mu bakoresha imbuga nkoranyambaga yakoresheje imvugo ‘jenoside yibasira inyokomuntu’, mugenzi we aramukosora, yemera gukosoka, asiba ubutumwa yari yanditse mbere, abusimbuza uburimo imvugo yemewe. Gusa hari habanje kubaho impaka hagati ya babiri.
Minisitiri Utumatwishima ntabwo yagaragaje niba ari aba yavugaga, ariko yashimiye urubyiruko ku bw’umuhate wo gusesengura ibyanditswe, gukosorana no kwigishanya, aboneraho gusaba ko hajya habaho koroherana. Ati: “Rubyiruko, muri abo gushimirwa kuko buri nteruro yanditswe na mugenzi wacu muyisesengura mukamenya ko yanditse ibikwiye. Mukamukosora, akiga, kugira ngo hatagira n’undi wakora ikosa nk’irye. Mu rugendo rwo gukora neza, abantu barakosa. Tworoherane ariko twemere no gukosorwa.”
Imvugo zemewe
- Bavuga jenoside yakorewe Abatutsi, ntibavuga: intambara yo mu 1994, intambara ya Jenoside, itsembabatutsi, itsembatsemba, itsembabwoko, itsembabwoko n’itsembatsemba, ubwicanyi bwo mu 1994 cyangwa Isubiranamo ry’amoko, jenoside y’Abatutsi, jenoside yo mu Rwanda, amahano yabaye mu Rwanda cyangwa ibyabaye mu 1994.
- Bavuga Imibiri y’abazize jenoside yakorewe Abatutsi, ntibavuga ‘Amagufwa cyangwa ibisigazwa by’abazize jenoside’.
- Bavuga Kubungabunga ibimenyetso by’abazize jenoside yakorewe Abatutsi, ntibavuga ‘Gushyingura ibisigazwa’.
- Bavuga Inzibutso za Jenoside yakorewe Abatutsi, ntibavuga ‘Amarimbi y’abazize jenoside’.
- Bavuga Abacitse ku icumu cyangwa Abarokotse Jenoside yakorewe Abatutsi, ntibavuga ‘Abacikacumu’.
- Bavuga Ingengabitekerezo ya jenoside, ntibavuga ‘Ingengasi ya jenoside’.
- Bavuga Gushyingura mu cyubahiro imibiri y’abazize Jenoside yakorewe Abatutsi, ntibavuga ‘Guhamba abazize jenoside’.
Kudakoresha imvugo ziboneye bishobora gutuma umuntu akurikiranwaho ibyaha birimo: guhakana jenoside yakorewe Abatutsi, kuyipfobya cyangwa kuyiha ishingiro.
