Umukandida Paul Kagame w’umuryango FPR Inkotanyi, ibikorwa byo kwiyamamaza ku mwanya w’umukuru w’igihugu yari asanzweho yabisoreje i Bumbogo mu karere ka Gasabo, umujyi wa Kigali.
Ibihumbi by’abaturage byari byaturutse mu bice bitandukanye by’igihugu by’umwihariko mu karere ka Gasabo, ku wa 2 Kanama 2017, bari bateraniye ahateguwe mu murenge wa Bumbogo aho bakiriye umukandida wabo, Paul Kagame.
Abayobozi b’indi mitwe ya Politiki yifatanyije na FPR Inkotanyi mu gushyigikira umukandida wayo nabo bari mu mbaga y’abaturage i Bumbogo mu bikorwa byo kwamamaza Paul Kagame.
15:00: Umukandida wari utegerejwe n’ibihumbi by’abaturage nibwo yasesekaye i Bumbogo, yakirijwe amashyi n’impundu, abanza kuzenguruka abasuhuza hakoreshejwe imodoka, intero ikaba yari imwe mu bamushyigikiye, bagira bati “Kagame wacu, muzehe wacu, tuzamutora”.
Nyuma y’iminota 10 ahageze, 15:10 ubwo yari amaze kugera mu byicaro yateguriwe, hakurikiyeho kuririmba indirimbo y’umuryango FPR Inkotanyi, bahagurutse bose, bati “FPR muryango w’Abanyarwanda waharaniye kera kuzarurengera, amaboko yacu azakorera u Rwanda,…”.
[xyz-ihs snippet=”google-pub”]
15:15: Umuhanzi Hategekimana ukomoka mu karere ka Gasabo, yahawe umwanya asusurutsa imbaga y’abaturage bari bateraniye i Bumbogo, n’indirimbo ye ‘Hitamo’ ikubiyemo amagambo agira ati “Hitamo Kagame intwari Hitamo, va ku giti dore umuntu Kagame, Kagame Paul ni wowe,… ikomeza igaragaza ibikorwa by’indashyikirwa Paul Kagame yagejeje ku Banyarwanda birimo mituweli,Girinka,… by’umwihariko ubu Umunyarwanda ngo akaba afite agaciro karuta aka ‘Diyama bavuga’.
Abayobozi b’indi mitwe ya Politiki bahawe ijambo:
15:20: Perezida w’ishyaka PSD, Dr Biruta, Ati “Abanyarwanda barashima cyane ibyagezweho, bafite inyota y’iterambere ryihuse ibyo byose kandi bishingiye ku rukundo bafitiye umukandida wacu, tuzamutora, urukundo barumufitiye kuko bazi ko abakunda ibyo abijeje akabishyira mu bikorwa, ibyo mbabwira twabibonye aho twagiye tuzenguruka, dushingiye kuri ibyo nta kabuza ku wa Gatanu tuzatsinda.
Azatsinda cyane rwose, mu izina ry’ishyaka PSD turagirango tubizeze ko tuzafatanya mu iterambere rirambye, muri iyi myaka 7 iri imbere, tuzakomeza ubudasa bw’Abanyarwanda no kubaka Demokarasi ibereye Abanyarwanda.
15:25: Mukakarisa Donatille, Perezida w’ishyaka PL na we agira ati “iminsi 19 tumaze tuzenguruka igihugu, Abanyarwanda babagaragarije urukundo babakunda”.
Ibyo byose ngo ni ubudasa butangaje Paul Kagame yagaragarije Abanyarwanda, arukuye ahabi, ko yahagaritse jenoside, atsinda urugamba none ubu u Rwanda rukaba rutengamaye.
Akomeza agira ati “Muri iyi myaka 7 iri imbere tubijeje ubufatanye, imikorere itagira amakemwa izakomeza, tora Kagame Paul Tugere ku itarembere rirambye, umutekano, amahoro yatugejejeho”.
15:30: Perezida w’ishyaka PDI, Sheikh Musa Fazil Harerimana, yatangiye agira ati “nyakubahwa Perezida wa Repubulika udasanzwe, ishyaka PDI turashimira umuryango wa RPF Inkotanyi wateguye iki gikorwa cyo kwiyamamaza, murimo gukoresha ijambo kwiyamamaza ariko ni ukubyina, kwidagadura,…
Tariki ya 4 Kanama, icyo tuzakora tuzongera guhamya ubudasa bwa Demokarasi, nta numwe utazi ko tuzabatora kuko ni twe twabibasabye, intsinzi irahari, icyo twe twavuga ni ugukomeza gusaba Imana ngo ikomeze ibarinde n’umuryango wanyu.
15:35 : Mukabaramba Agnes, umuyobozi w’ishyaka PDC na we agira ati “Perezida Paul Kagame yaduhaye ubwisanzure bwose, twasabye ko tugendana kuko uri umukandida w’Abanyarwanda bose, ni za miliyoni zishaka gutora Paul Kagame.
Iriya gahunda y’imyaka 7 turayemera kandi tuzabafasha urugendo rwo kubishyira mu bikorwa, Paul Kagame ibyo avuze arabikora, aratuganisha heza, dufitiye ikizere aho mutuganisha, niyo mpamvu abarwanashyaka b’ishyaka PDC bifatanyije na mwe muri urwo rugendo”.
16:05: Ijambo ry’ushinzwe kwamamaza umukandida w’umuryango FPR Inkotanyi mu gihugu, Uwacu Julienne akanaba Minisitiri w’umuco na siporo, yavuze ko Abanyarwanda bishimira ibyiza bamaze kugeraho kubera Paul Kagame.
Akomeza agira ati “Impamvu zo gutora umukandida wacu Rudasumbwa Paul Kagame zirigaragaza, dufite umuyobozi udasanzwe, dufite icyerekezo gisobanutse, icyo twaje gukora uyu munsi ni ukugaragaza igihango gufitanye.
Dufite imbaraga mwaduhaye, dufite ubumwe, nta wundi tubikesha nta wundi ni wowe nyakubahwa Perezida wa Repubulika, nutarageze i Kigali (Rwanda) arakurikirana, nta handi wabona imbaga y’abantu bangana gutya, iyo ni intsinzi tudashidikanyaho, imyaka yashize mwakoreye abashima”.
Abasaza mwabahaye gusaza neza, ababyeyi mwabahaye kugubwa neza,… umuntu ashyize hamwe ibyo byose ntabwo yashidikanya ku intsinzi, ndabasaba banyamujyi, Banyagasabo, twambaye ikirezi kandi kirera, ntacyo twashinja Imana kuko yaramuduhaye.
[xyz-ihs snippet=”google-pub”]
Twaje guhamya igihango, aha ntabwo naje kwamamaza kuko ibikorwa birivugira, iyi myaka 7 iri imbere, abasore inkumi, abagabo n’abasaza, … abandi badutega iminsi ntabwo uri Perezida wabo, ni twe tuzakwitorera kandi tuzakomeza gufatanya nyakubahwa.
16:17: Ijambo ry’umukandida Paul Kagame
Umukandida Paul Kagame yakiranwe amashyi menshi cyane, imbaga y’abaturage n’ibyishimo byinshi bagira bati ‘Muzehe wacu, turagukunda”, na we abashimira uburyo bitabiriye ari benshi kandi bakeye ndetse bishimiye, ati “Ntabwo bisanzwe”.
Akomeza agira ati “Nkuko byavuzwe hari ababyifuza badashobora kubibona, ndishimye cyane, twagiye mu turere twose turi muri iki gikorwa turimo cya Demokarasi kirimo kwiyamamaza n’amatora.
Ndagirango nshimire muri iki gikorwa cyo kwiyamamaza abantu bari hano muri Gasabo, hari abantu twajyanye muri buri karere, twari kumwe hose ndabashimira cyane mwarakoze.
Dutangira (Ruhango) hari ibyo navuze, abadutega iminsi, ubu kubera ko babonye ko kuduhagarika bitagishobotse baravuga ngo ‘ariko buriya Kagame naba atakiri umuyobozi u Rwanda ruzagira amahoro?’ nabaza ngo ariko mbere ya Kagame u Rwanda rwari rufite amahoro, ibyo se ko babishimaga, bashimaga ibyo bya mbere ya Kagame u Rwanda rudafite amahoro, none baradutega nyuma ya Kagame.
Bakavuga ngo nibo bazanye Demokarasi, nibo bayigisha, mu bya vuba aha hari abagiye mu gikorwa cya Demokarasi bajya mu matora, hanyuma baravuga ngo ntabwo byagenze uko twashakaga, ngo bagiye muri mudasobwa, baduhaye umuyoboz tutashakaga, wavuga ute ko utamushaka?.
Warenga kuri ibyo ukajya kwigisha abandi Demokarasi ute, na we ibyawe byakunaniye, iyo Mudasobwa yaguhitiyemo umuyobozi gute?
Hari abavuga ngo Kigali hari isuku, iyo suku ngo ntabwo ari Demokarasi ni ubuyobozi bw’igitugu, icyo bivuze ni agasuzuguro basuzugura Afurika, basuzugura u Rwanda.
Kuvuga ngo ibyo dukora twese twumvikanyeho no mu bumwe, nibigira ingaruka mbi, tuzahangana nabyo nkuko twahanganye n’ingaruka z’ibyo baduteye, n’ubundi ni twe bigarukaho, iyo ibintu bimaze guhinduka nabi nibwo basubira inyuma bagahita bigendera ariko ni uburengenzira bwabo.
Igikorwa cyo guhitamo umuyobozi w’igihugu, inshingano afite, burya inshingano y’umuyobozi, umuyobozi ni we uterwa imijugujugu y’abo ayobora, rwose natewe imijugujugu rwose ntayo izabageraho, mu gihe tukiri kumwe iyo mijugujugu ni njye izajya igarukiraho.
Itariki 4 ukwezi kwa 8, ni ugutora icyo gipfunsi, icyo kivuze ubumwe bw’igihugu cyacu, ubudasa bwacu, amajyambere yacu, bivuze Abanyarwanda bafite ituze, bakagirirana ituze, bivuze abikorera bagakora bagateza imbere igihugu cyabo.
Bivuze imiyoborere myiza, aho umuyobozi abazwa ibyo akora mu nshingano ze, bivuze umunyarwanda kuvuga akumvikana icyo ashaka icyo ari cyo cyose, uwo ari we wese, bivuze kugendera hamwe tukihuta tukagera aho twifuza, bivuze urubyiruko rwacu kururera neza, rukihangira imirimo rukiteza imbere rugateza imbere n’igihugu cyacu.
Bivuze umutegarugori w’u Rwanda kwiteza imbere agafatanya n’umugabo we, bivuze u Rwanda gufatanya n’abandi hirya no hino tugatera imbere mu bufatanye, bivuze umutekano urambye kuri buri wese.
Bantu ba Gasabo rero, muzaba mutoye ibyo byose navugaga. Ibivugwa byose by’amagambo mabi ntabwo byica, ubyumvira muri kumwe bigasohokera mu kundi, Murakoze cyane!
16:38: Ubwo umukandida Paul Kagame yari asoje ijambo hakurikiyeho umwanya wo gucinya akadiho n’indirimbo zitandukanye “Nta Ntambara yantera ubwoba” indirimbo yakoreshejwe cyane muri ibi bikorwa byo kwiyamamaza, aho umukandida Paul Kagame na we yakunze kuvuga ko nta ntambara yamutera ubwoba afite imbaga y’abaturage bafite ubumwe.
K anda hano ujye ubona amakuru yihuse kandi kugihe kuri Facebook no kuri twitter
Itangishatse Théoneste/Bwiza.com – Gasabo
