Kuri uyu wa Gatatu, itariki 15 Gashyantare, umuyobozi mukuru wa leta yavuze ko ingabo za Somalia zishe abaterabwoba barenga 200 bafitanye isano n’umutwe w’iterabwoba wa al-Shabaab ukorana na al-Qaeda mu gihe cy’ibikorwa bya gisirikare byabereye muri Leta eshatu zambura uduce twinshi uyu mutwe .
Minisitiri w’itangazamakuru muri Somalia, Daud Aweis, mu kiganiro n’abanyamakuru mu murwa mukuru Mogadishu yavuze ko ibikorwa byabereye i Galmudug, muri Leta ya South West no muri Jubaland.
Ati: “Muri iki cyumweru aba al-Shabaab Khawarij basaga 200 bishwe n’igisirikare.”
Yongeyeho ko igisirikare cyanabohoye uduce twinshi kitwambura umutwe w’iterabwoba mu karere ka Mudug kandi gifata impuguke imu gukora ibisasu y’umutwe w’iterabwoba nk’uko iyi nkuru dukesha Anadolu Agency ivuga.
Aweis yavuze kandi ko Perezida Hassan Sheikh Mohamud yahamagariye abaturage ba Somaliya gutanga idorari 1 kuri buri muntu muri “gahunda yo kurinda igihugu no kwibohora.”
Yabisobanuye agira ati: “Iki gikorwa kigamije kwihutisha ibikorwa bya gisirikare byo gukuraho iterabwoba no guha abantu amahirwe menshi yo kugira uruhare mu bikorwa bikomeje.”
Igisirikare cya Somalia gihanganye na al-Shabaab kuva Perezida Mohamud yatangaza “intambara yeruye” kuri uyu mutwe nyuma yo kongera gutorerwa manda ya kabiri muri Gicurasi umwaka ushize.
Kubera igitutu cyinshi cy’ibikorwa bya gisirikare, abaterabwoba ba al-Shabaab bakajije umurego mu gihugu mu minsi yashize, bibasira abashinzwe umutekano, ibirindiro bya gisirikare, ndetse n’ibigo bya leta.
