Ubuyobozi bwa Amerika bwafashe icyemezo cyo gufatira umutungo uri muri Leta Zunze Ubumwe za Amerika w’Umuyobozi w’Umujyi wa Monrovia, umurwa mukuru wa Liberia. Ambasade ya Amerika i Monrovia ivuga ko ashinjwa ihohoterwa rikorerwa abo batavuga rumwe muri politiki, guhonyora uburenganzira bwa muntu na ruswa nk’uko bitangazwa na VOA.
Umuyobozi w’umujyi, Jefferson Koijee, arashinjwa kuba yarategetse imiryango isa nk’imitwe yitwara gisirikare ifitanye isano n’ishyaka rye, kandi akaba ari we uyigenzura, kwitambika imyigaragambyo y’abatavuga rumwe n’ubutegetsi, abanenga guverinoma cyangwa abitandukanyije na guverinoma hagati ya 2018 na 2022 nk’uko byemejwe na Leta Zunze Ubumwe za Amerika kuri uyu wa Gatandatu ushize.
Koijee ni umuyobozi mukuru wa CDC, ishyaka rya Perezida George Weah ucyuye igihe, uherutse gutsindwa mu matora y’umukuru w’igihugu na Joseph Boakai nyuma y’amatora rusange yishimiwe kubera uko yakozwemo mu karere kakunze kurangwamo guhirika ubutegetsi.
