Ingabo z’Intara ya Tigray (TPLF) mu majyaruguru ya Ethiopia ziravuga ko Eritrea yagabye igitero simusiga kandi imirwano ikaze yabereye mu turere twinshi ku mupaka nk’ikimenyetso cyo kongera ubukana mu mirwano yongeye kubura mu kwezi gushize. Amerika nayo yemeje ko Ingabo za Eritrea zinjiye muri Ethiopia irabyamagana .
Kuri uyu wa Kabiri, Umuvugizi wa Tigray People Liberation Front (TPLF), Getachew Reda, yatangaje ko Eritrea iri gufatanya n’Ingabo za Leta ya Ethiopia, zirimo imitwe y’abakomando, ndetse n’imitwe yitwara gisirikare.
Abinyujije kuri twitter Reda yagize ati: “Eritrea irimo kohereza ingabo zayo zose kimwe n’inkeragutabara. Ingabo zacu ziri kurinda ibirindiro byazo mu butwari ”
Nta bisobanuro byatanzwe n’abayobozi bo muri Ethiopia cyangwa Eritrea, ku biri kubera mu majyaruguru ya Tigray.
Ibiro ntaramakuru Reuters byatangaje ko abashinzwe ubutabazi babiri bavuze imirwano ikaze ku mupaka, harimo no kurasa mu nkambi y’abakuwe mu byabo. Ntibavuze niba Ingabo za Eritrea zari ku butaka muri Tigray.
Umukozi ushinzwe ubutabazi mu Mujyi wa Adigrat wo mu majyaruguru ya Ethiopia yatangarije Ibiro Ntaramakuru by’Abanyamerika (AP) ko Ingabo za Eritrea zarashe mu turere tuwukikije.
Intumwa idasanzwe ya Amerika mu ihembe rya Afurika, nawe yavuze ko Amerika izi ko Ingabo za Eritrea zambuka zikinjira muri Tigray ku butaka bwa Ethiopia.
Mike Hammer mu kiganiro n’abanyamakuru nyuma y’uruzinduko yagiriye muri Ethiopia gufasha koroshya ibiganiro by’amahoro hagati ya Leta ya Ethiopia na TPLF bihagarariwe na AU, yagize ati: “Dukurikirana urujya n’uruza rw’Ingabo za Eritrea zambuka umupaka… kandi turabyamaganye”.
Yakomeje agira ati: “Abanyamahanga bose bagomba kubahiriza ubusugire bwa Ethiopia kandi bakirinda guhembera amakimbirane”.
Nibiramuka byemejwe, uruhare rw’ingabo za Eritrea rushobora kurushaho gukaza amakimbirane yongeye kwaduka mu kwezi gushize nyuma yo guhagarika imirwano kuva muri Werurwe.
