Mu gihe Komisiyo y’igihugu y’amatora muri Uganda imaze kubarura hafi 65% by’amajwi yose y’abatoye, Perezida Yoweri Kaguta Museveni akomeje gusatira intsinzi izamwemerera kuyobora Uganda muri manda ya gatandatu yikurikiranya.
21:00: Museveni akomeje gukoza imitwe y’intoki ku ntsinzi
Amajwi y’agateganyo aheruka gutangazwa na Komisiyo y’Amatora arerekana ko Museveni akiyoboye n’amajwi 62.23%, Robert Kyagulanyi akamugwa mu ntege n’amajwi 30.62%.
Umukandida w’Ishyaka FDC, Patrick Amuriat aracyari inyuma cyane kuko amajwi ye ari ku ijanisha rya 3.67%.
Mu gihe Perezida Museveni ari gukomeza gusatira intsinzi, Bobi Wine bahanganye yamaganye ibikomeje gutangazwa na Komisiyo y’Amatora, asaba Abanya-Uganda guhaguruka bakarwana ku kuri kwabo.
Muri rusange Museveni amaze kubona amajwi 4,047,820 mu gihe Bobi Wine amaze kubona 1,993,236.
Biteganyijwe ko ibyavuye muri ariya matora bizatangazwa by’agateganyo ku mugoroba w’ejo ku wa Gatandatu tariki ya 16 Mutarama.
16:30: Museveni aracyari imbere n’amajwi hejuru ya 60%
Ikiciro cya gatanu cy’ibyavuye mu matora ya Uganda yabaye ejo ku wa Kane, kirerekana ko Museveni akiri imbere n’amajwi 62.74%.
Bisobanuye ko uyu mukabwe w’imyaka 76 y’amavuko yamanutseho amajwi 3% ugereranyije n’amajwi yaherukaga gutangazwa na Komisiyo y’Amatora mu masaha ashize.
Bobi Wine yazamutseho amajwi abiri kuko ubu afite amajwi 29.3%, mu gihe amajwi amaze kubarurwa angana na 49.14% by’abatoye bose.
15:50: Turi mu kaga gakomeye, abasirikare batugose_Bobi Wine
Robert Kyagulanyi uzwi nka Bobi Wine, aravuga ko ubuzima bwe buri mu kaga bitewe n’uko igisirikare cyagose urugo rwe.
Amakuru aturuga muri Uganda aravuga ko kuva mu gitondo abasirikare bari bagose urugo rw’uriya munya-Politiki.
Bobi Wine kuri Twitter, yavuze ko abasirikare bamaze kurenga uruzitiro rw’urugo rwe, bakaba bamukikije.
Ati: “Twagoswe. Igisirikare cyasimbutse uruzitiro none cyigaruriye urugo rwacu. Nta n’umwe mu basirikare batuvogereye uri kutubugisha. Turi mu kaga gakomeye, twagoswe.”
14:40: Amajwi ya Museveni yongeye kuzamuka, aya Bobi Wine aramanuka
Ibyavuye mu matora y’umukuru w’igihugu muri Uganda bikomeje gutangazwa na Komisiyo y’Amatora, birerekana ko Perezida Museveni yongeye kuzamuka mu majwi y’agateganyo, mu gihe amajwi ya Bobi yagabanutse.
Mu gihe hamaze kubarurwa amajwi 34.3 y’abatoye bose, Museveni ayoboye ku ijanisha rya 65%, mu gihe Bobi Wine afite amajwi 27.56%.
Patrick Amuriat w’Ishyaka FDC we afite amajwi 3.46%, mu gihe Gen Mugisha Muntu afite amajwi 0.69%.
13:00: Bobi Wine yamaganye ibyavuye mu matora, yiyita Perezida watowe
Bobi Wine kuri uyu wa Gatanu yamaganye ibikomeje gutangazwa na Komisiyo y’Amatora muri Uganda, avuga ko ari we Perezida watowe.
Uyu mugabo w’imyaka 38 y’amavuko mu kiganiro yagiranye n’itangazamakuru cyabereye iwe mu rugo, yavuze ko ubujura bw’amajwi buri kuba muri Uganda ari bwo bwa mbere bukomeye mu mateka y’iki gihugu.
Yunzemo ko ubu ari bwo urugamba rwatangira, mu gihe urugo rwe rwose ruzengurutswe n’abasirikare.
11:10: Amajwi ya Museveni atangiye kubaganuka, aya Bobi Wine arazamuka
Nyuma y’ikiciro cya gatatu cy’ibyavuye mu matora bimaze gutangazwa aho hamaze kubarurwa amajwi yo muri site z’itora 10, 212 imibare irerekana ko amajwi ya Museveni yamanutse, aya mukeba we Kyagulanyi arazamuka.
Museveni amaze kubona amajwi 1,852,263 angana na 63.92% mu gihe Bobi Wine amaze kubona amajwi 821,874 angana na 28.36%.
Perezida Museveni ni we ukiyoboye, Bobi Wine akaba akomeje kumugwa mu ntege, mu gihe hamaze kubarurwa amajwi arenga 29.44 % y’agomba kubarurwa yose.
08:40: Amajwi ya Museveni akomeje kuzamuka
Ikiciro cya kabiri cy’ibyavuye mu matora by’agateganyo, kirerekana ko Perezida Museveni akiri imbere, ndetse amajwi ye akaba akomeje kuzamuka.
Mu gihe hamaze kubarurwa amajwi yo ku masite 8310, Perezida Museveni amaze kubona amajwi 1,536,205 angana na 65.02%; mu gihe Robert Kyagulanyi uzwi nka Bobi Wine bahanganye amaze kubona amajwi 647,146 angana na 27.39%.
Abandi bakandida ni Patrick Amuriat umaze kubona amajwi 84,969 angana na 3.6%, Katumba umaze kubona amajwi 8,886 angana na 0.38%, Mao umaze kubona amajwi 16,315 angana na 0.65% na Mayambala ufite amajwi 5,135 angana na 0.22%.
Gen Mugisha Muntu we amaze kubona amajwi 16,673 angana na 0.71%, Mwesigye umaze kubona amajwi 7,160 angana 0.30%, Kalembe umaze kubona amajwi 12,081 angana na 0.51%, Tumukunde umaze kubona amajwi 13,813 angana na 0.58% na Kabuleta umaze kubona amajwi 15,403 angana na 0.65%.
07:00: Museveni yatangiye kwanikira abo bahatanye
Imibare ya Komisiyo y’Amatora muri Uganda, yerekana ko hamaze kubarurwa amajwi arenga 85,000 yo ku masite y’itora 330.
Muri ayo majwi 81,724 ni yo yemewe, 3,997 ntiyemerwa mu gihe imfabusa zabaye 153.
Amajwi y’agateganyo yerekana ko Perezida Museveni ari imbere aho yatowe n’ababarirwa mu 50,097 bangana na 61.3% mu gihe umugwa mu ntege ari Bobi Wine umaze gutorwa n’ababarirwa mu 22,802 bangana na 27.90%.
Uwa gatatu ni Patrick Oboi Amuriat w’Ishyaka FDC umaze gutorwa n’abantu 4,617 bangana na 5.65%.
