Umunyamabanga Mukuru w’Umuryango Mpuzamahanga wa Francophonie, Louise Mushikiwabo, yamaganye byimazeyo igitero cya Azerbaijan muri Nagorno-Karabakh.
Mu itangazo rye, Umunyamabanga Mukuru w’uyu muryango “yamaganye byimazeyo ibikorwa bya gisirikare byatangijwe na Azerbaijan mu karere ka Nagorno-Karabakh” anasaba ko iki gitero cyahita gihagarara.
Yagaragaje ko yihanganishije kandi yifatanyije n’imiryango y’abapfuye n’abakomeretse.
Louise Mushikiwabo yashimangiye akamaro ko kubahiriza ihagarikwa ry’imirwano hakurikijwe itangazo ryo ku itariki ya 10 Ugushyingo 2020 no gukemura mu mahoro amakimbirane hagati ya Azerbaijan na Armenia nk’uko tubikesha New.am.
Akarere ka Nagorno-Karabakh kari hagati ya Azerbaijan na Armenia kakomeje kuba intandaro y’ubushyamirane hagati y’ibihugu byombi, kaje kugirana amasezerano na Azerbaijan ahagarikiwe n’abunzi b’ingabo zishinzwe kubungabunga amahoro z’u Burusiya yo guhagarika imirwano guhera saa saba kuri uyu wa Gatatu ushize.
Hanumvikanywe kandi ku bijyanye no kuvana imitwe isigaye n’abasirikare ba Armenia mu karere koherejwemo ingabo z’u Burusiya zishinzwe kubungabunga amahoro no gusesa imitwe yitwaje intwaro yo muri Nagorno-Karabakh, kwambura intwaro abahanganye no gukura ibikoresho n’intwaro ziremereye ku butaka bwa Nagorno-Karabakh mu rwego rwo gukemura amakimbirane.
Byongeye kandi, kuri uyu wa Kane, abahagarariye Artsakh cyangwa Repubulika ya Nagorno-Karabakh itarabona ubwigenge na Azerbaijan, barahurira i Yevlakh, umujyi wo muri Azerbaijan uherereye nko mu birometero 100 mu majyaruguru y’uburasirazuba bwa Stepanakert, kandi haraganirwa ku gukemura ibibazo byo kubungabunga umutekano w’Abanyarumeniya bo muri Nagorno-Karabakh.
