Umutwe witwaje intwaro wa M23 wagaragarije Abanyekongo n’amahanga umuvuno w’ingabo za Repubulika ya demukarasi ya Congo uri gutuma urugamba rubera muri Masisi rugorana.
Mu itangazo ryashyizwe n’Umuvugizi wayo, Lawrence Kanyuka kuri uyu wa 9 Werurwe 2023, M23 yavuze ko ihuriro rya FARDC, imitwe yitwaje intwaro n’abacancuro riri kwifashisha ibirindiro bya misiyo y’amahoro y’Umuryango w’Abibumbye (MONUSCO) nk’inkingi irikingira.
Kanyuka yagize ati: “M23 yamaganye ikoreshwa ry’ikigo cya MONUSCO kw’ihuriro rya Leta ya RDC mu kurasa amabombe ku birindiro bya M23 no mu bice bituwe bya Mushaki, Karuba, Malehe no mu nkengero zaho. Ubu buryo bwo kwifashisha MONUSCO n’ahantu hayo nk’inkingi ni ukwica itegeko ry’intambara no guhagarika imirwano.”
Umuvugizi wa M23 yasabye Umuryango w’Abibumbye kwamagana FARDC, iyi mitwe yindi n’abacancuro bifatanya kuko ngo byongerera abakozi ba MONUSCO n’umutungo wabo ibyago byo kwangirika, kandi ngo ibi bitero biri guteza imfu no guhunga kw’abasivili.
Imirwano irakomeje mu gihe impande zombi zasabwaga kuyihagarika tariki ya 7 Werurwe 2023. M23 yashyize hanze itangazo ivuga ko iyihagaritse, nyuma itangaza ko ihuriro rya FARDC, iyi mitwe yitwaje intwaro n’abacancuro bongeye kuyirasaho.
